radheef.info
ރަދީފު


ނު
އކ (1) ނަފީގެ އަކުރެއް. މިއަކުރުގެ މާނަދޭހަވާނީ ބަހަކާއި ގުޅުވައިގެން ބުނުމުގައެވެ މިސާލު: )ހ( ނުބަލާ! )ށ( ނުދޭ! )ނ( ނުކާނަން (2) ނުދަންނަ އެއްޗެއް
ކޮންމެ
ނއ (1) ގިނަ އެއްޗެހިތަކެއްގެ ހުރިހައި ތަކެތި ވަކިވަކިން ބުނެދިނުމަށްޓަކައި ބޭނުންކުރާ ބަހެއް މިސާލު: ކޮންމެ ފޮތެއްގައި ނަންބަރުޖަހާށެވެ (2) ގިނަ ބައެއްގެ ތެރެއިން ހުރިހައި މީހުން ވަކިވަކިން ބުނެދިނުމަށްޓަކައި ބޭނުންކުރާބަހެއް މިސާލު: ކޮންމެ ކުއްޖަކީ ފަތަން ދަންނަ ކުއްޖަކަށް ވާންވާނެއެވެ
ކޮންމެހެން
ކއ (1) ލާޒިމުވެގެން (2) ނުކޮށްނުވެގެން
ކޮންމެވެސް
)ނއ ( (1) ކުރުމާއި ނުކުރުމުގެ މައްޗަށް ކުރާ އަމުރު ގަދަކުރުމަށް ޖުމުލައިގެ ކުރިއަށް ގެންނަ އަކުރެއް މިސާލު: )ހ( ކޮންމެވެސް އަންނާތި )ށ( ކޮންމެވެސް ނުދާތި (2) އެއްޗެހިތަކެއްގެ ތެރޭން ވަކިއެއްޗެއް ޚާއްޞަނުކޮށް އެކަތި ކަމަށް އިޝާރާތްކުރާ އަކުރެއް މިސާލު: )ހ( ކޮންމެވެސް އެއްޗެއްދެއްވާ (3) ބައެއްގެ ތެރޭން ވަކި މީހަކު ނުވަތަ ވަކިބަޔަކު ޚާއްޞަނުކޮށް އެކަކު ކަމަށް ނުވަތަ ބައެއް މީހުންކަމަށް އިޝާރާތްކުރާ އަކުރެއް މިސާލު: ކޮންމެވެސް މީހަކުއައެވެ
ކޮންތާކު
އ (1) ހުރިތަނެއް އޮޅުން ފިލުވުމުގެ ގޮތުން ސުވާލުކުރަން ބޭނުންކުރާ އަކުރު (2) ތިމާ ދެނަހުރި ކަމެއްގެ ވާހަކަ އަނެކަކު ބުނީމާ އެކަން އެނގިހުރެ އެކަން ގަދަކޮށްލުމަށް ހަމަތިޔަހެންހޭ ބުނުމުގެ ބަދަލުގައި ބުނެއުޅޭ ބަހެއް (3) ތިޔައީ ދޮގެކޭ ބުނުމުގެ ބަދަލުގައިވެސް ހަމަ މިބަސް ބުނެއުޅެއެވެ މިސާލު: މިހާރު ތިޔައުޅެނީ މީހަކާ އިންނަންދޯއޭ ބުނުމުން ކޮންތާކު މީހަކާއި އިންނާކަށް ނޫޅެން
ކޮންސެލްކަން
ނ (1) ދަށުދަރަޖައިގެ ސަފީރުކަން. (2) އެއްދައުލަތަކުން އަނެއް ދައުލަތަކަށް ފޮނުވައިފައި ހުންނަ އެފޮނުވި ދަޢުލަތުގެ ރައްޔިތުންގެ ވިޔަފާރިއާއި އެހެނިހެން ކަންތައް ބަލަހައްޓާ ވަކީލުކަން
ކޮންޓްރެކްޓް
ނ (1) ކުރާވަކިކަމެއްގެ ބަދަލުގައި އަގެއް ނުވަތަ ޚިދުމަތެއް ދިނުމަށް ދެފަރާތެއްގެ ދެމެދުގައި ލިޔެ ސޮއިކުރާ އެއްބަސްވުން (2) ދެމީހެއްގެ ދެމެދުގައި ނުވަތަ ދެމީހުންނަށްވުރެ ގިނަ ބައެއްގެ މެދުގައި އެއްބަސްވެވޭ އެއްބަސްވުމެއް މިއެއްބަސްވުމަކީ ގާނޫނު ޤަބޫލުކުރާ ނުވަތަ ޤާނޫނު ބާރުދޭ އެއްބަސްވުމަކަށް ވާންވާނެއެވެ
ކޮންޓްރެކްޓްކުރުން
މ (1) ކުރާވަކި ކަމެއްގެ ބަދަލުގައި އަގެއް ނުވަތަ ޚިދުމަތެއް ދިނުމަށް ދެފަރާތެއްގެ ދެމެދުގައި އެއްބަސްވުމެއް ލިޔެ ސޮއިކޮށް އެއްބަސްވުން (2) ދެމީހެއްގެ ދެމެދުގައި ނުވަތަ ދެމީހުންނަށްވުރެ ގިނަބައެއްގެ މެދުގައި އެއްބަސްވުން )މިއެއްބަސްވުމަކީ ޤާނޫނު ޤަބޫލުކުރާ ނުވަތަ ޤާނޫނު ބާރުދޭ އެއްބަސްވުމަކަށް ވާންވާނެއެވެ
ކޮންޕިއުޓަރ
ނ ކަރަންޓުގެ ބޭނުންކޮށްގެން ވަރަށް ހަލުއިކޮށް ހިސާބުހަދާ މެޝިނެއް. މިމެޝިނަކީ އެއަށް މަޢުލޫމާތު ލެވޭނެގޮތަށާއި މަޢުލޫމާތު ރައްކާ ކުރެވޭނެ ބަޔަކާއި ވިޔަހަދާ ބަޔަކާއި މަޢުލޫމާތު ބޭރުކުރެވޭނެ ބައެއްގެ މައްޗަށް އެކުލެވޭ މެޝިނެކެވެ މީގެ ވަރަށް ގިނަ ބާވަތްތައް ހުރެއެވެ
ކޮރާހިނގުން
މ ފަޔަށް ލިބުނު ގެއްލުމެއްގެ ސަބަބުން އެއްފައި މައްޗަށް ޖެހެމުން ހިގުން
ކޮރު
ނއ (1) ޅެންހެދުމާއި އިބާރާތްކުރުމުގައި އޮމާންކަންނެތް (2) އެއްފައިކުރު (3) ހަމައަށް ނުހިނގޭ (4) ވަޑާންކަށީން ކޮންނަވަޅު (5) ކަންފަތުގެ ލޯވަޅު (6) ނ )ސ ( އަލަމާރިއާއި މޭޒުފަދަ އެއްޗެހީގެ ވަތްގަނޑު
ކޮރުނެގުން
މ (1) ކޮންނަ ރޮންދާއަކުން ލަކުޑިގަނޑެއްގެ ހަނިއަރީގެ މެދުތެރޭން ހަނިދިގުކޮށް ކޮނުން. މިއީ ދޮރުފަތްފަދަ އެއްޗެހި ޖެހުމުގައި ފިލާ ލެއްވުމަށް ކުރާ ކަމެކެވެ. (2) ކުޅި ޖެހުމުގައި އެއްފައިތިލަ އަނެއް ފައިގެ ކުޑަކަޅުވާމަހުގައި ކާއްތަމުން ދޯނތްގާ ހަމައަށް ނަގައިފައި މައްޗަށް ފުންމައިގަތުން (3) ރުޅި އައިސްގެން އެއްޗެހިގޮވުމުގެ ތެރޭގައި ވައްތަރު ޖައްސަމުން އެގޮތް މިގޮތަށް ފުމުން (4) ބާވަތެއްގެ ފުމުމެއް މިއީ ފަންޑިތަ ހެދުމުގައި އަޖިދައަށް ޖައްސާ ވައްތަރެކެވެ މިވައްތަރަށް އަޖިދައަށް ކޮރުނެގުން ވެސް ކިޔައެވެ
ކޮރުކަން
ނއނ (1) ޅެންހެދުމާއި ޢިބާރާތްކުރުމުގައި އޮމާންކަން ނެތްކަން (2) އެއްފައި ކުރުކަން (3) ހަމައަށް ނުހިނގޭކަން
ކޮރުދަން
ނ (1) ބަޑިރޯކުރާ ފޮލިސާއަށް ލައްވާން ފޮތީން ނުވަތަ ކަފައިން ދެއުޅިޔަށް ޅަކޮށް އަނބުރާ އެއްޗެއް (2) ބަޑިރޯކުރާ ފޮލިސާއަށް ލައްވާން ފޮތީން ނުވަތަ ކަފައިން ކުރުފަލަކޮށް ޅަކޮށް އަނބުރާ އެއްޗެހި
ކޮރުތަކުރުލަވަ
ނ ދަނޑިބެރާއި ދުންމާރީގެ ލަވައެއް މިއީ ހުކުރު ދުވަހު ހަތްފިޔަވަޅު ބެރުގެ ތިންބައި ލަވަ ތެރޭގައި ޖަހާ އުޅުނު ލަވައެކެވެ
ކޮރުޖިންނި
ނ ޖިންނީންތެރޭ އުޅޭ އެއްފައިކޮރު ނުބައި އެއްޗެއްކަމަށް ބުނެއުޅޭ ޖިންނިއެއް
ކޮރެކޮރެފާނު
ނ )ގ ( ކޮރެފާނު
ކޮރެފާނު
ނ )ގ ( ރޭގަނޑަށް ގޮވާ ފަންޏެއް މިއީ ކަޅުމުށިކުލައިގެ ހިމަދިގު ފަންޏެކެވެ މިފަނިގޮވާކަމަށް ބުނެއުޅެނީ ކޮންމެވެސް ޚާއްޞަކަމެއް މެދުވެރިވާން ވުމުން އެކަމުގެ ޢަލާމާތެއްގެ ގޮތުންނެވެ މިސާލަކަށް: މީހަކު މަރުވާންވުމުން ނުވަތަ ރަށުގައި ނުރައްކާ ރޯގާ ބަލިކަމެއް ފެށެން ވުމުންނެވެ
ކޮބަޑި
ނ ދަތްސާފު ނުކުރުމުން ދަތުގައި ހެދޭ ރީނދޫ ކުލައިގެ ހަޑިއެއްޗެއް މިއެންމެ ބޮޑަށް އުފެދެނީ ދަތުގެ ބުޑުދޮށުގައެވެ
ކޮބާ
އކ (1) ނުފެނިގެން އުޅޭ އެއްޗެއް ވީތަނެއް އެނގޭތޯ ނުވަތަ ކަމެއް އޮޅުން ފިލުވާން ސުވާލުކުރުމަށް ބޭނުންކުރާ އަކުރެއް. މިސާލު: )ހ( މަގޭރުމާ ކޮބާ؟ )ށ( ކަލެއާ ޙަވާލުކުރި ކަންތައް ކޮބާ؟ (2) މީހަކު މިވެނި ގޮތަކަށް ކަމެއް ވެދާނެޔޭ ބުނެފައި އޮއްވާ އަނެކަކު އެބަސް ނާހައި އެކަންތައް ކޮށްގެން ކުރީގައި ބުނިމީހާ ބުނިގޮތަށް ކަންތައްވީމާ އެކަމެއް ކުރިމީހާއާއި ދިމާއަށްބުނެ އުޅޭ ބަހެއް މިސާލު: ކޮބާ މަބުނިގޮތަށް ނޫންހޭވީ (3) ނިކަން މިސާލު: ކޮބާދީބަލާ
ކޮޅަލި
ނ (1) ދެގަނޑެއްޗެއް ގުޅުވުމަށްޓަކައި ކަނޑާ ކެނޑުން ވަޅަށް ފައްތާން ބޭނުންވާ އެތިގަނޑުގެކޮޅުން ކަނޑަމުންގޮސް ކެންޑުންވަޅަށް ފައްތައި ހަރުލެއްވުމަށްޓަކައި ނުކަނޑައި ބާއްވާ ތަންކޮޅު (2) )ޅ ( އައްޕަތް