radheef.info
ރަދީފު


ނުވަތަ
އ (1) ނޫންނަމަ (2) އެހެންނާ (3) އެހެންޏާ
ފިތް
ނ (1) އާދަމުގެ ދަރިންނާ ކުކުޅުހާފަދަ ބައެއް އެއްޗެހީގެ އެތެރެ ހަށީގައި އޮންނަ ވަރަށް ކުޑަ ގުނަވަނެއް. މިއީ ހަޖަމު ކުރުމުގެ ދިޔަ އުފައްދާ ގުނަވަނެވެ. (2) ބައެއް ތަކެތި ހަދައިފައި ހުންނައިރު އެއްސިފަޔަށް އުފުލިފައި ހުންނަހެން ހަދައިފައި ހުންނަ ތަންތަން. މިސާލު: ގޯނބިލިފުޅީގެ ފިތް. (3) ކެވޭ އެއްޗަކުން ނުވަތަ އެހެންވެސް ގޮތަކުން ގައިގެ ތަންތަނުން އުފުލޭ ތަންތަން. (4) ލުނބޯ ފޮނިލުނބޯ ފަދަ އެއްޗެހީގެ އެތެރޭގައި ބައިބައި ވަކިކޮށް ނެގެން ހުންނަ ބައިތަކުން ބައެއް. (5) މިޔުޒިކް ކުޅެން ގެންގުޅޭ ބައެއް އެއްޗެހީގައްޔާއި ރޭޑިޔޯގައި ހުންނަ ބައިތަކުން ބައެއް. (6) ބައިސްކަލް ޗޭނާއި ގަޑީ ޗޭނާއި ކަމަރުފަދަ ތަކެތީގެ ބަދައެއް. (7) ފިތްޖެހި ތެލީގައި ހުންނަ ކޮންމެ އަޑިތަނެއް. (8) ފުމެން ގެންގުޅޭ ދުންމާރީގެ ކޮޅަށް ފަނުން ނުވަތަ އެނޫންވެސް އެއްޗަކުން ހަދައިގެން ޖަހައިފައި ހުންނަ އެތިކޮޅު
ފިތްނެގުން
މ (1) ހަށިގަނޑުގެ ތަންތާގައި ބައެއް ޒާތުގެ އެއްޗެހި ހެފީމާ އެ ތަނެއް ދުޅަވުން. (2) މީހެއްގެ ނުވަތަ ކުއްޖެއްގެ ގައިގައި އިލޮށި ފަތިން ނުވަތަ އިލޮއްޓަކުން އަދި ނުވަތަ އެއްތެޔޮ ގަނޑެއް ފަދަ ހިމަ އެއްޗަކުން ޖެހީމާ އެތަނެއް އުފުލުން (3) ވިހައެއްގެ ސަބަބުން ނުވަތަ ބައްޔެއްގެ ސަބަބުން ހިރުވައިފައި ނުވަތަ ނުހިރުވާ ހަށިގަނޑުގެ ތަންތަންކޮޅު އުފުލުން
ފިތްދާލި
ނ ދިވެހި ބޭހުގެ ބާވަތެއް މިއީ ގައިން ފިތްނެގުމުން ގާނައިގެން ވަށާން ނުވަތަ ބޯން ބޭނުން ކުރާ ފިތްފިތަށް ހުންނަ ލަކުޑިއެކެވެ
ފިތްގަނޑު
ނ ކެވޭ އެއްޗެއްގެ ސަބަބުން ނުވަތަ ގައިގައި އެއްޗެއް ހެފުމުން ހަށިގަނޑުން އުފުލޭ ތަންތަން މިސާލު: މާމަކުނު ހެފީމާ ނަގާ ފިތްގަނޑު
ފިލައިރައްކާވުން
މ ބައެއްގެ ތެރޭގައި އުޅެފައި ދިޔަނުދިޔަ ތަނެއް ނޭގޭގޮތަށް އެ ތަނަކުން ނުވަތަ އެބަޔަކާ ވަކިވެގެން ދިއުން
ފިލާއެޅުން
މ ދަތުރުކުރާ އުޅަނދު ހުރިތަން ދެނެގަތުމަށްޓަކައި ހިސާބުކުރުން. މިއީ ޢަރުޟާއި ޠޫލު ދެނެގަތުމަށްޓަކައި ސިކިސްތާނު ނުވަތަ ގޮއިދުރުވާނުން އިރަށް ނުވަތަ ތަރިއަށް ބަލައިގެން ކުރާ ހިސާބެކެވެ
ފިލާފޮތި
ނ ގަސްގަނޑަކުން ނުވަތަ ލަކުޑި ގަނޑަކުން ކީހައިގެން ނަގާ ދިގު ތުނިބައެއްގެ ބުރިވަރެއް
ފިލާލިއުން
ނއ ކުޑަކުދީންނަށް ކިޔަވައި ދިނުމަށްޓަކައި ފިލާގައި ޤުރުއާނުގެ އާޔަތްތައް ލިއުން ނުވަތަ އަލިފުބާގެ އަކުރުތައް އެޅުން
ފިލާގަނޑުބަނުން
މ ގައިގެ ތަނެއް ބިނދި ނުވަތަ ހާނީއްކައެއް ލިބިގެން ނުވަތަ އެނޫންވެސް ފަރުވާއަކަށް ތައްޔާރުކުރާ ބޭސްގަނޑެއް ފަތުގައި ފަތުރައިގެން ގައިގައި އަޅައި އެއްސުން
ފިލި
ނ (1) އަކުރުގެ އަޑުނެރޭގޮތް އޮޅުން ފިލުވައިދިނުމަށް ޖަހާ ނިޝާން. މިސާލު: އަބަފިލި އިބިފިލި (2) ގަހެއްގެ ނަން (3) ފުރޯދަނޑިއާއި ވަޑާން ކައްޓާއި ކޮށާވަޅި ފަދަ އެއްޗެހީގެ މުށްގަނޑުގައި ދަގަނޑުން ނުވަތަ ލޮއިން އަޅައިފައި ހުންނަ ބަންދު (4) އެންހިފާއިރު ދަލުތެރެއަށް ޖަހަން ފިލިމަހުން ކަހައިފައި ހުންނަ މަސް (5) ފަރު ކެޔޮޅުކަމުގައި މަސްތިލަ ކުރުމަށް އުކާ ކަރުގޮހޮރު ފަދަ ތަކެތި (6) "ފިލުން" މިބަހުގެ ނިމިނިމުނުކަން މަޖާޒު: (7) ރިޝްވަތު (8) ކަމެއް ކުރުވުމަށް ބާޜުއެޅުވުމުގެ ގޮތުންދޭ އެއްޗެހި
ފިލިކޯޅި
ނ (1) ޅެންބައިތުގެ ކުރީބަޔާއި ފަހުބައިގެ ފެށޭ ދެއަކުރު ނުވަތަ ދެތިން އަކުރުގައި ޖެހޭ ފިލި (2) ރައިވަރުގެ ހުރިހާބަހެއްގެ ކުރީ ދެއަކުރުގައި ނުވަތަ ދެތިން އަކުރުގައި ޖެހޭ ފިލި
ފިލިކޯޅިހަމަކުރުން
މ ޅެންބައިތުގެ ކުރީބަޔާއި ފަހަތުބަޔާއި ރައިވަރުގެ ހުރިހާ ބަހެއްގެ ކުރީގެ ދެއަކުރު ނުވަތަ ދެތިން އަކުރެއްގެ ފިލި އެއްގޮތް ކުރުން
ފިލިއެޅުން
މ ވަޅި ފުރޯ ފަދަ އެއްޗެހީގެ ތިލަ ހިފެހެއްޓުމަށާއި މުށްގަނޑު ނުވަތަ ދަނޑިފެޅުނަ ނުދިނުމަށްޓަކައި މަޢުދަނަކުން ހަދައިފައިވާ ބަންދެއް އެޅުން
ފިލިވަހަށް އައުން
މ (1) މޫދުތެރެއަށް ފިލިޖަހައިލީމާ އޭގެ ވަހަށް މަސްތައް ނުވަތަ އެންތައް އެތަނަކަށް ޖަމާވުން (2) މަޖާޒު: ތަނެއްގައި ތިމާ ގަޔާވާ ކަމެއް ހިނގާކަން އެނގުމުން އަވަސް އަވަހަށް އެތަނަކަށް ދިއުން
ފިލިތެޅުން
މ ކަކުނި ނުވަތަ ބަރަވެލި ދޮންވެއްޔާއެކު ތަޅައި ފިލި ތައްޔާރުކުރުން
ފިލިޖެހުން
މ (1) ތާނައާއި ޢަރަބި ލިޔާއިރު އަކުރުގެ އަޑު ނެރޭނެގޮތް ދެއްކުމަށް އެ އަކުރުތަކުގެ ތިރީގައި ނުވަތަ މަތީގައި އަކުރަށް ވުރެ ކުޑަ ނިޝާނެއް )ފިލި( ޖެހުން (2) އަކުރުގެ އަޑު ނެރުމަށް އަކުރާ ގުޅައިފައި ހުންނަ ކުޑަ ނިޝާން ޖެހުން (3) އަކުރަކާޖެހިގެން ފިލިއަކުރެއް ލިއުން (4) ފިލިމަހުގެ އެތިއެތި ކޮޅު އުކުން މަޖާޒު: (5) ރިޝްވަތު ދިނުން (6) ކަމެއް ކުރުވުމަށް ބާރުއެޅުމަށް އެއްޗެހި ދިނުން
ފިލްމަށްނެގުން
މ އެކިއެކި ހަރަކާތްތަކާއި މަންޒަރުތައް ވީޑިއޯއަށް ނުވަތަ ބައިސްކޯފަށް ނެގުން
ފިލްމު
ނ (1) ބައިސްކޯފު ދައްކާފީތާ (2) ފޮޓޯ ނުވަތަ ފިލްމް ނެގުމަށް ކެމެރާއަށް ލައްވާ ރޯލު
ފިލްޓަރުވުން
މ ފެން ނުވަތަ ތެޔޮ ނުވަތަ ވައި ފިލްޓަރުގެ ތެރޭން ސާފުވުން
ފިޔަ
ނ (1) އުދުހޭ އެއްޗެހީގެ ވަރަ. (2) މާމެލާމެލީގައި ކަރުގަނޑުގެ ވަށައިގެން ބޭރަށް ނުކުމެފައި ހުންނަ ބައިތައް. (3) ފަންކާއާއި ބުރަފަތި ފަދަ ތަކެތީގައި ހިމަދިގުކޮށް ނުވަތަ ކުރުފަލަކޮށް ވަށައިގެން ބޭރަށް ނުކުމެފައިވާ ވައިފޮނުވައިދޭ ނުވަތަ ފެނުތެރޭ އަނބުރައިދޭ ބައި މިފަދަ ތަކެތީގައި ޢާއްމު ގޮތެއްގައި ހުންނާނީ ތިންފިޔައެވެ (4) ފިޔަ އަކުން ނައްޓައިލެވޭ ފަށް