radheef.info
ރަދީފު


ވ
ތާނައިގެ ނުވަވަނަ އަކުރު
ހިތްހަލާލު ހޯދުން
މ (1) ހިތުގެ ރުހުން ހޯދުން (2) ހިތުގެ ސާފު ރުހުން ލިބިގަތުން މިކަމަކީ ފިރިމީހާގެ ކިބައިން އަނބިމީހާ މައިންބަފައިންގެ ކިބައިން ދަރިން އެދުރުންގެ ކިބައިން ދަރިވަރުން ލިބިގަންނަ ކަމެކެވެ
ހިތްހިތަކަށްވުން
މ (1) އަމިއްލަ އަމިއްލައަށް ކަންކުރެވޭގޮތްވުން (2) ބަޔަކު މީހުންގެ ހިތަށްއެރިހައި ގޮތަކަށް ކަންކުރެވޭގޮތްވުން
)ހަރުބަހެއް( ބޭނުންނެތް ނަމަ ސާފުކޮށް ބުނުމަށާއި އަނެކާގެ ހިތުގައި ނުޖެއްސުމަށް ނަސޭހަތްތެރި ވުމުގެ ގޮތުން ބުނެއުޅޭބަހެއް ހިތްހިތުގައި ނުޖައްސާށެވެ ހިތްނެތިއްޔާ ނުކުރާށެވެ
ހިތްހިތެކޯގޮވުން
މ (1) ހިތަށްއެރި ގޮތެއް ހަދާށޭގޮވައިލުން (2) ބޭނުންމީހަކު ބޭނުން ވަރަކަށް ގެންދާށޭ ގޮވައިލުން
ހިތްހުއްޓުން
މ ހިތުގެ ހިނގުން ބަންދުވުން
ހިތްހެޔޮ
ނއ (1) މީހުންގެ މައްޗަށް ހިތުގައި ލޯބިހުރި (2) އޯގާވެރި (3) ހިތުގައި ނުބައެއްނުވާ
ހިތްހެޔޮކަން
ނއނ (1) މީހުންގެ މައްޗަށް ހިތުގައި ލޯބިހުރިކަން (2) އޯގާވެރިކަން
ހިތްހެޔޮކުރުން
މ (1) ހިތްބަރުކަމެއް ނުބޭއްވުން (2) ނުރުހުމެއް ރުޅިވެރިކަމެއް ހިތުގައި ނުބޭއްވުން (3) މަޖާޒު: ހިތުން ފިލުވައިލުން މިސާލު: އަހަރެންގެމަތިން ހިތްހެޔޮކޮށްލާށޭ މިހެންބުނެފިނަމަ އޭގެމާނައަކީ ހަނދާންނައްތާލާށޭ މިއެވެ
ހިތްހެޔޮވުން
މ (1) މީހުންގެ މައްޗަށް ހިތުގައި ލޯބިހުރުން (2) އޯގާވެރިވުން (3) ހިތުގައި ނުބައިއެއްނުވުން
ހިތްނުބައި
ނއ (1) ހިތްހެޔޮކަމުގެ އިދިކޮޅު (2) މީހާގެ އެތެރެފުށްވާނުސާފު (3) ނުނިޔަތްލާ (4) ހަސަދަވެރި (5) ރުޅިވެރި
ހިތްނުބައިކަން
ނއނ (1) މީހާގެ އެތެރެފުށް ނުސާފުކަން (2) ޙަސަދަވެރިކަން (3) ނުނިޔަތްލާކަން (4) ހިތުގައި އުފެދޭ ރުޅިވެރިކަން
ހިތްނުބައިވުން
މ (1) މީހާގެ އެތެރެފުށް ނުސާފުވުން (2) ހަސަދަވެރިވުން (3) ނުނިޔަތްލުން (4) ރުޅިވެރިކަން އުފެދުން
ހިތްރުހުން
މ ހިތްޤަބޫލުވުން
ހިތްރުއްސުން
މ ގަބޫލުކުރުވުން
ހިތްރޮއްވުން
މ ހިތަށް ހިތި އަސަރެއްކުރުވުން
ހިތްބަރުވުން
މ (1) ހިތުގައި ކިލަނބުކަން ހިނގުން (2) ހިތްނުބައިވުން
ހިތްބަލި
ނއ (1) އަވަހަށް އަސަރުކުރާގޮތް ހުންނަ (2) ފިނޑި (3) ހިތްވަރު ދެރަ
ހިތްބަލިވުން
މ (1) ފަސޭހައިން ހިތުގައި ޖެހުން (2) ކިތަންމެ ކުޑަކަމުންވެސް އަވަހަށް އަސަރުކޮށް މޮޅިވުން (3) ކަންތަކާ މާބޮޑަށް ދެރަވުން
ހިތްބިރު
ނ ބައްޔެއްގެ ނަން. މިބަލީގައި އެއްވެސް ކަމެއްނެތި ނުވަތަ ސަބަބެއްނެތި ބިރުގަނެއެވެ
ހިތްބިރުގަތުން
މ އެއްވެސް ކަމެއް ނުވަތަ ސަބަބެއްނެތި ބިރުގަތުން