radheef.info
ރަދީފު


މޭވާ
ނ (1) އަންނާރު ފޭރު އަނބުފަދަ ގަސްގަހުގައި އަޅާ ކާއެއްޗެތި (2) ބައެއް ގަސްގަހުގައިގަހުގައި އަންނަމަތިވަރު (3) މަޖާޒު: ކަންކަމުގެ އެދެވޭ ނަތީޖާ (4) ދަރިން
މަތިވަރުދިއުން
މ (1) ރުއްގަހުގައި މޭވާ އެޅުން މެދުކެނޑުން (2) އައިސްފައިވާ މަތިވަރު ހުސްވުން
މާ
ނ (1) ގަސްގަހާ ގެއްސާއި ވެޔޮވެލާވެލި ފޯދުމަށް ދައްކާ ޢަލާމާތް. (2) އެއިން މޭވާ ނުވަތަ އޮށް ނުކުންނަ ފިޔަތަކަކުން އެކުލެވިގެންވާ ކުލަ ރީތި އެއްޗެއް. (3) ނަކަތެއްގެ ނަން. )ހުޅަނގު މޫސުމުގެ ދިހަވަނަ ނަކަތް( (4) ބޮޑު )ނ.އ.( މިސާލު: މާކަނޑު. (5) އަޅައިބެލުމުގެ ގޮތުން ބޭނުންކުރާ ބަހެއް. މިސާލު: )ހ( މާކުޑަ. )ށ( މާބޮޑު. (6) ނަމަވުމުގެ މާނައިގައި ބޭނުންކުރެވޭ ބަހެއް. މިސާލު: )ހ( އޭނާ ދިޔައިމާ އަހަރެން ދާނަމެވެ )ށ( އޭނާ އައިމާ އަހަރެން އަންނާނަމެވެ
މާގަސް
ނ (1) މޭވާއެއްނާޅާ ހަމައެކަނި މާ އަޅާގަސް (2) މާގަހާ އެއްގޮތަށް ހަދައިފައި ހުންނަގަސް
މުނިޔާ
ނ އަޑުރީތި ކުޑަ ދޫންޏެއް )މިދޫނީގެ ބޮޑު މިނަކީ ގާތްގަނޑަކަށް ދެއިންޗިބައި ނުވަތަ ތިން އިންޗިހާވަރެވެ މިއީ ގޮވާމާއި މޭވާކައި އުޅޭ ދޫންޏެކެވެ މުނިޔާގެ ތިންވައްތަރެއް އުޅެއެވެ އެއީ ޖަންގަލީ މުނިޔާއާއި ރަތްމުނިޔާއާއި ފަރުބަދަމަތީ މުނިޔާއެވެ
މުއިއެރުން
މ )ޏ ސ ( ބައެއްކަހަލަ މޭވާއަށް ފުށްއެރި ފައްކާވުން
މެށުން
މ (1) ލަކުޑިފަދަ އެއްޗެއްގެ ބޭރު ތޫނު އެއްޗަކުން ތުނިކޮށް ކޮށުން (2) މޭވާފަދަ ތަކެތީގެ ބޭރުތޮށި ތޫނު އެއްޗަކުން އެއާ ވަކިކުރުން (3) ވެއްޓިގެން ނުވަތަ ތަނެއްގައި ޖެހިގެން ހަށިގަނޑުގެ ތަނަކުން ލޭގެ އަސަރު ފެންނަވަރަށް ހަންދިއުން (4) )ބދ ( އޮޑައު
ފަހުތިބީން
)ނ ( (1) ފަހުން ތިބޭނެ މީހުން މިސާލު: އަހަންނަށް މިގަހުގެ މޭވާ ނުލިބުނަސް ފަހުތިބީންނަށް ލިބޭނެއެވެ (2) ފަހުން އަންނާނެ މީހުން (3) ނަމާދުގެ ޖަމާޢަތުގައި އިމާމާ އާއި ތަބާވެގެން ތިބޭމީހުން
ފަޅޯ
ނ (1) މީރު މޭވާއެއް. މީގެ ކިތަންމެ ވައްތަރެއް ހުރެއެވެ. މިސާލު: ދިގުފަޅޯ ނިޔަދުރުފަޅޯ ރަންފަޅޯ ދަނބުފަލޯ ވެޔޮފަޅޯ (2) )ބދ ( ފޯދިކާގަސް
ފައު
ނއ (1) މޭވާފަދަ އެއްޗެހި ދޮންވެގެން ފައްކާވެގެންވާ މަޑު (2) ބަނބުކޭލާއި ކުއްޅަވައް ފަދަ އެއްޗެހި އެކި ގޮތްގޮތުން ކުރާމަޑު (3) ނ ކަނޑޫ ނުވަތަ ކުއްޅަވައް ހެދިފައި ހުންނަ ތަންތަން (4) ބޮނބި މަޑުކުރަން ބަހައްޓައިފައި ހުންނަތަން (5) އަށްހިޔަބޮލި (6) ފާ (7) )ބދ ( ހާސް
ފައްކާވުން
މ މޭވާފަދަ އެއްޗެހި ދޮންވެ ފުރިހަމަވުން
ފަތްކެޔޮ
ނ ދޮންނުވާއިރު ފަލަމަޑީގެ ގޮތުގައި ބޭނުންކުރާ ދޮންވުމުން މޭވާއެއްގެ ގޮތުގައި ބޭނުންކުރާ އެއްޗެއް. މިސާލު: ބޮންތިރަތްކެޔޮ. ސަންޕާކެޔޮ ފުސްކެޔޮ މާޅޮސްކެޔޮ ބޮޑުކެޔޮ އޮށިކެޔޮ ރަތްކެޔޮ ކަނދިލިކެޔޮ ސުވާސާކެޔޮ ފުސްމާޅޮސްކެޔޮ
ފާ
ނ (1) ކުއްޅަވަކާއި ކަނޑޫ ފަދަ ތަކެތި ހެދިފައި ހުންނަ ތަންތަން. (2) ބޮނބި މަޑުކުރަން އަޅާފައި ހުންނަ ތަންތަން. މިތަންތާނގައި ހުންނާނީ ފެން ހެދިފައެވެ. (3) ދަނޑި މޫދު އަޅާފައި ހުންނަ ތަންތަން. (4) އަށްހިޔަބޮލި (5) މޭވާ ފަދަ ތަކެތި ދޮންވެ ފައްކާވެގެން ގޮސް ވާ މަޑު. (6) ވިހައިގެން އުޅޭ މީހުންނަށް ހިލާ ބޭހެއް. (7) ކައިރި ހިސާބެއްގައި ކުނިބުނި ވަޅުލެވިފައި ހުރުމުގެ ސަބަބުން ނުވަތަ ގިނައިން ފެން ނެގުމުގެ ސަބަބުން ބައެއް ވަޅު ވަޅުގެ ފެން ގަނޑަށް އަންނަ ބަދަލު (8) ހަށިގަނޑުގެ ތަނަކަށް ހާނީއްކައެއް ލިބި އެތާނގެ ލޭ ނުބައިވުމުގެ ސަބަބުން ވާމަޑު
ފާކުރުން
މ (1) ވަކިވަރަކަށް ދޮންވެފައި ހުންނަމޭވާ ފައްކާވެގެން މަޑުވާނެ ގޮތް ހެދުން (2) ބަނބުކެޔޮ ވަޅުލައިގެން މަޑުވާގޮތް ހެދުން (3) ކެކުރި ފިތައިގެން މަޑުވާގޮތް ހެދުން (4) ދަނޑި ފަދަ އެއްޗެހި މޫދު އަޅައިގެން ތޮށި މަޑުކުރުން (5) އޮޅުގައި ނުވަތަ މޫދުގައި އަޅައިގެން ބޮނބި މަޑުކުރުން (6) މަޖާޒު: ތިމާކުރަންޖެހޭ ކަމެއް ބޮލުން ނައްޓައިލައިގެން އަނެކެއްގެ ބޮލުގައި އެޅުވުން (7) އުނދަގުލެއް ޖެއްސުން
ފާވުން
މ (1) މޭވާފަދަ ތަކެތި ދޮންވެގެންގޮސް މަޑުވުން (2) ބަނބުކެޔޮ ފަދަ ތަކެތި އެއްޗަކަށްލައި ބަންދުކޮށް ހާސްކުރީމާ މަޑުވުން (3) ބަލިމަޑުކަން މެދުވެރިވާ މެދުވެރިވުމަށް ބުނެއުޅޭ ބަހެއް (4) ކަމެއް ނުބައިކޮށްފާނެ ފަދަ މީހަކު ތަނަކަށް އައުމުން ބުނެއުޅޭ ބަހެއް މިސާލު: އެއްވެސް ކަމެއް ނުނިމުނީ އޭނާ އެތަނަށް ފާވެގެންނެވެ (5) ހަށިގަނޑުގެ ތަނަކަށް ހާނީއްކައެއް ލިބި އެތާނގެ ލޭނުބައި ވުމުގެ ސަބަބުން މަޑުވުން (6) އެއްޗެހި ނުވަތަ ފެން ފެންގަނޑު ތަޣައްޔަރުވެގެން ނުބައިވުން
ތޮށި
ނ (1) ރަށެއްގެ ވަށައިގެން ނުވަތަ ރަށުގެ އެއްފަރާތެއްގެ މޫދުތެރޭގައި ގަލުން ލެވިފައިވާ ނުވަތަ ލައިފައިވާ ފާރު (2) ފަރު (3) ގަސްގަހާއި މޭވާގެ ބޭރުގައި ހަރުކޮށް ހުންނަފަށަލަ (4) ބިސްއަޅާ ތަކެތި އަޅާ ބިހުގެ ބޭރުގައި ހަރުކޮށް އޮންނަބައި (5) ބައެއްމީހުންގެ ހަންރާޅުވުމުގެ ސަބަބުން ހުޅުނބުހެން ހަމުގައި ހެދިފައި ހުންނަ އެތިއެތިކޮޅު (6) ވެލަ އާއި އިއްސާއި ކަކުނިފަދަ ދިރޭ ތަކެތީގެ ހަށިގަނޑުގެ ބޭރުގައި ހަރުކޮށް އޮންނަބައި
ތޮށިގަނޑު
ނ (1) ރަށެއްގެ ވަށައިގެން ނުވަތަ ރަށެއްގެ އެއްފަރާތެއްގެ މޫދުތެރޭގައި ގަލުން ލެވިފައިވާ ފާރުގަނޑު (2) ބިހުގެ ބޭރުގައި އޮންނަ ހަރުބައި (3) ގަސްގަހާއި މޭވާގެ ބޭރުގައި ހަރުކޮށް އޮންނަބައި (4) ވެލަޔާއި އިއްސާއި ކަކުނިފަދަ ދިރޭތަކެތީގެ ހަށިގަނޑުގެ ބޭރުގައި ހަރުކޮށް އޮންނަބައި މަޖާޒު: (5) ޙަޤީޤަތް ފޮރުވުމަށްޓަކައި ބޭރުން ދައްކައިގެންއުޅޭގޮތް (6) މީހެއްގެ ވިސްނުމާއި ޚިޔާލު ގެންގުޅޭ ހަނިދާއިރާ
ގޯނބިލި
ނ ބިލަމަގު ގަހާ ވައްތަރު އެއަށްވުރެ މައްޗަށް ހެދޭ ގަހެއްގައި އަޅާ ވަށްކޮށް ފަތިކޮށް ފިތްފިތް ހުންނަ މޭވާއެއް މީގައިދެނީ ހުތްރަހައެވެ
ފާޑިވުން
މ )ޏ ( މޭވާ ދޮންވެ ފައްކާވުން
ފީ
ނ (1) ލަކުޑިޔާއި މޭވާއާއި މިނޫންވެސް ބައެއް ތަކެތި ގިނަދުވަސް ވެގެންވާ ހަލާކު. (2) ދޫނިސޫފާސޫފި ބިސްތައް މަތީގައި އޮންނަ އޮތުމުން ބިހަށް އަންނަ ބަދަލު. (3) ބިހަށް ގެއްލުމެއް ލިބިގެން ނުވަތަ ގިނަ ދުވަސް ވެގެންވާ ހަލާކު (4) ބިސް ފީކުރާ ދުވަސްވަރު ކުކުޅަށްވެފައި ހުންނަގޮތް (5) ބައެއް ތަކެތީގައި ހަލާކު ވާންވެގެން ޖަހާ ކަޅުކުލައިގެ ލައްތަކެއް (6) ބައެއް ޒާތުގެ ޚިދުމަތަށާއި ބައެއް ހުއްދައަށް ދައްކަންޖެހޭ ފައިސާ (7) މަޖާޒު: ކަމުނުދާ (8) ރަނގަޅު ނޫން
ފީވުން
މ (1) ލަކުޑިއާއި މައުދަނުގެ ތަކެތި ބާވެ އެތަކެތީގެ ބާރުދިޔުން (2) މޭވާއާއި ގޮވާން ފަދަ ތަކެތި ގިނަދުވަސް ވެގެން ބޭނުން ނުހިފޭ ވަރަށް ހަލާކުވުން (3) ކުޑަކުދިން ރުޅިގަދަ ވެފައި ފިނޑިވުން (4) ބިސްފީކުރާ ދުވަސްވަރު ކުކުޅަށްވެފައި ހުންނަ ގޮތްވުން (5) މަޖާޒު: ވެރިކަމާއި ޢާއިލާ ތަކާއި މީހުންގެ ބާރުކެނޑުން