radheef.info
ރަދީފު


ޑ
ނ ތާނައިގެ އަށާރަވަނަ އަކުރު
ގޮށަނި
ނ )ޏ.ސ.( ހިކާވައްތަރުގެ ކުދިމަހެއް. މިމަސް އުޅޭނީ ފަޅުމަތީގައި ގާތަކުގެ ތެރޭގައެވެ ކުއްލި ދުވުމެއްގައި ގޮސް މަޑުކޮށްގެން ގިނަވަގުތު ހޭދަކުރެއެވެ
ގޮށި
ނ (1) އެތެރެއަށް އެއްޗެހި އެޅޭގޮތަށް ނުވަތަ އެއްޗެހީގެ މަތިންޖެހޭ ގޮތަށް ފުލަށް ހިމަކޮށް ތޫރިކޮށް ހަދައިފައި ހުންނަ އެއްޗެއް މިތަފާތު އެއްޗިހިން ވަރުވަރަށް ހަދައިފައި ހުރެއެވެ މިސާލު: )ހ( ކަރުދާހުގޮށި )ށ( ބިޑިއަނބުރާގޮށި (2) މުކައްބަ
ގޮށިދީދި
ނ ދުނބުރި ފަތުގެ ކުރީކޮޅު ބައެއް ނާރުތައް ހުންނަފުށަށް ލަނބައިލައި ކޮޅުގައި ލޯވަޅެއް ހުންނަގޮތަށް ދެފަރާތް ފައްތަރުކޮށް އިލޮށި ކޮޅެއް ޖަހައިފައި އެ ލޯވަޅުން ތަނޑިނެރެގެން ހަދާއެއްޗެއް މިހަދަނީ ކުޑަ ކުދިންގެ ކުޅޭކުޅޭ ދަރިފުޅަކަށެވެ
ގޮށިދީދިހެއްދުން
މ އަންހެން ކުދިން ބޮޑެތި މީހުން ލާކަހަލަހެދުން އަޅުވައި ނަލަހެއްދުން
ގޮށިގޮނޑި
ނ ގޮށީގެ ބައްޓަމަށް ހަދައިފައި ހުންނަ ގޮނޑި
ގޮށުން
މ (1) ބަތްފަދަ ތަކެތި މަޑުވެ ޗަސްވުން (2) ގެށިފައިވުން
ގޮށުވައިލުން
މ މަޑުކޮށްފައިހުރި އެއްޗެއް އުނދުޅިއެއް ފަދަ އެއްޗަކުން ޗިސްކޮށްލުން
ގޮށް
ނ (1) ގަމީސް ލިބާސް ފަދަ އެއްޗެހީގައި ލުމަށް ތަފާތު އެއްޗެހިން ތަފާތު ގޮތްގޮތަށް ހަދައިފައި ހުންނަ އެއްޗެއް. (2) ގައިގެ އެކި ތަންތަނުން ފުއްޕާ ހަރު ތަންތަންކޮޅު. (3) ބައެއްކަހަލަ އެއްޗެހީގައި އުފުލިފައި ހުންނަ ހަރުތަންތަންކޮޅު. މިސާލު: ގަސްގަހުގައި ހުންނަގޮށް. (4) ލަކުޑި ކީހައިފައި ހުންނައިރު އާރުގެ މެދުގައި ހުންނަ ހަރުތަންތަންކޮޅު. (5) ހަށިގަނޑުގެ ބައެއް ނިޒާމު ހަމަޖެއްސުމަށްޓަކައި އިންސާނުންނާއި ބައެއްޙައިވާނުގެ ހަށިގަނޑުގެ ބައެއް ތަންތަނުގައި ގޮށްގޮށް ހެންހުންނަ ގުނަވަނެއް މިއީ ހަށިގަނޑަށް ބޭނުންވާ ބައެއް އެއްޗެހި އުފައްދައި ބޭނުންނުވާ ބައެއްޗެހި ނައްތައިލާ ގުނަވަނެއް މިސާލު: ކުޅުއުފައްދާގޮށް (6) ފަށެއްގެ ދެކޮޅު ހުޅުވުމަށް ބާރުކޮށް ޖަހާމަޅި މިސާލު: )ހ( ވަގޮށް )ށ( ދަމާގޮށް
ގޮށްރާޅުގަނޑު
ނ ކަނޑުގައި އެގޮތް މިގޮތަށް ރާޅުހެދިފައި ހުންނަ ތަންތަން
ގޮށްބުރި
ނ (1) ގަހަކުން ކަނޑައިލައިފައިއޮތް ގޮށްހުރި ބައެއް (2) މަޖާޒު: ވަށްއަގުޅި އަޅައިފައި އޮންނަ ކަންނެޔޮބުރި (3) ކުރުކޮށް ފަލަކޮށް ތިބޭމީހުން
ގޮށްކުޅަނދުރު
ނ ފަތްވަރަށް ހިމަކޮށް ހުންނަ ބިންމަތީގައި ފެތުރޭގޮތަށް ހެދޭގަހެއް. މިގަހުގެ އަޑިޔަށް ފައިބާ އެއްޗިއްސަށްވެސް ކިޔަނީ މިނަމެވެ. މިއީ މީރު ވަސްދުއްވުމަށާއި ބޭހަށް ބޭނުންކުރާ ވަރަށް މީރުވަސް ދުވާއެއްޗެކެވެ
ގޮށްއެރުވުން
މ އަތުގެ މުލައްދަނޑީގައި ޖަހައިގެން މީދާމަސްގަނޑު އުފުއްލުން
ގޮށްވަޅުހެދުން
މ ފޭރާމުގައި ހަރުކޮށްފައި ހުންނަގޮށް އެޅުވުމަށް ފޭރާމުގައި ކަނޑާ ލޯވަޅުގެ ކައިރިހެދުން
ގޮށްވިރުވުން
މ (1) ހަށިގަނޑުގެ ނާރެއްގައި ނުވަތަ މަސްގަނޑުގެ ތެރޭގައި އުފެދޭ ކުދި ހަރުތަންތަންކޮޅު ފަރުވާދީގެން ރަނގަޅުކުރުން (2) ފުށް އުއްސައިގެން ފޮނިއެއްޗެހި ހަދާއިރު އޭގައި ހުންނަ ފުށްގުޅަގުޅަ އަތުން ފިއްތައިގެން ގުޅަގުޅަޔަށް ނުހުންނާނޭގޮތް ހެދުން
ގޮށްމަޅި
ނ ހަތަރު ފަރާތަށް ހަތަރު ކަންގަނޑު ހުންނާނެހެން ޖަހާގޮށެއް. މި ގޮށްޖަހައި އުޅެނީ މަލާފަތްކޮޅު ތަށިކޮޅުފަދަ އެއްޗެހި ބަންނައިރުއެވެ
ގޮށްމަސް
ނ ބުރަ މަސައްކަތް ކުރާ މީހުންނާއި ހަށިގަނޑު ވަރުގަދަ ކުރުމަށް ކަސްރަތު ކުރާމީހުންގެގުނަވަންތަކަށް އަރައިފައިހުންނަ ހަރު ވަރުގަދަމަސް
ގޮށްމާވަޑި
ނ (1) އޮމާން ކަމެއްނެތި ކަސްކޮށް ލަކުޑިކޮށް އެއްޗެހި ހަދާމީހާ (2) މަޖާޒު: އާޑެއް ފާޑެއް ނެތްގޮތަށް ކަންތައްކުރާ މީހާ
ގޮށްމޮހުން
މ މަޖާޒު: (1) ކާވެނިރޫޅުން (2) ގުޅުންކެނޑުން
ގޮށްފައްޓަރު
ނ އުނަގަނޑުގައި އަޅަން ރިހިން ނުވަތަ ރަނުން ގޮށްގޮށަށް ގަތައިފައި ހުންނަ ފައްޓަރު
ގޮށްފިލުން
މ ގޮށްެނެތުން މިސާލު: މިހާރު އޭނާގެ ބޮލުގެ އިސްތަށިގަނޑުން ގޮށްފިލައިފިއެވެ