radheef.info
ރަދީފު


ޑ
ނ ތާނައިގެ އަށާރަވަނަ އަކުރު
ދިޔަވަރުގޮނޑުޖެހުން
މ ދިޔަވަރު އެންމެ ބޮޑުވާންވީވަރަށް ބޮޑުވުން
ދިޔަވުން
މ ކަނޑުގައި ދުއްވާ އުޅަނދެއްގެ ފެނުގެ އަޑީގައި ހުންނަބައިގެ ތަނަކަށް ލިބޭ ގެއްލުމެއްގެ ސަބަބުން އެތެރެއަށް ދިޔައެރުން
ދިޔަތަންޖެހުން
މ އޮޑިދޯނިފަހަރުން ދިޔައަރާގޮތްވީމާ ކޮޅައިމަދަން އެޅުން
ދިޔަލުން
މ މޭވާފަދަ އެއްޗެއް ނުވަތަ ހަށިގަނޑުގެ ތަނެއް ހަލާކުވެ ނުބައިވެގެން ފެންފޭބުން
ދިޔަގަނޑު
ނ (1) އޮޑިދޯނި ފަހަރުގެ ވަތުގައި ހުންނަދިޔަ (2) ގަރުދިޔަގަނޑު
ދިޔަޖެހުން
މ (1) ފެންހެލޭ ވަރަށް ކާށިހަރުވުން (2) އޮޑިދޯނި ފަހަރުގެ ދިޔަވާތަންތަން ފާހަގަކުރުން
ދިޔާކުރުން
މ (1) އެއްޗެއްގައި ހުންނަ އޮލަކަން ކަނޑުވައިލުން (2) އެއްޗެއްގެ އޮލަކަން ނުވަތަ ތަތްކަން ކަނޑުވައިލައި ދިޔާކަން އިތުރު ކުރުން (3) ބައެއް ކަހަލަ އެއްޗެހި ފެންކުރުން
ދިޔާވުން
މ (1) އޮލަ ނުވަތަ ތަތް އެއްޗެއް ހުންނަންވީ ވަރަށްވުރެ ދިޔާކަން ބޮޑުވުން (2) ހަރުކޮށް ނުވަތަ ހިކިކޮށް ހުންނަންވާ އެއްޗެއްހަލާކުވެގެން އޭގައި ތެތްކަން އުފެދުން މިސާލު: ބެޓެރީ ދިޔާވުން (3) ބައެއްކަހަލަ ހަރު އެއްޗެއްސާއި ތަތްއެއްޗެހި ހޫނުގެ ސަބަބުން ފެންވުން މިސާލު: )ހ( ތިމަރަދިޔާވުން )ށ( ރަބަރުދިޔާވުން
ދިޔޮޅު
ނ )ދ ( (1) އަތިރި (2) ގޮނޑުދޮށް
ދިޔޯގެރައިވަރު
ނ ޚިޔާލީ އަންހެނެއްގެ މައްޗަށް ހަދައިފައިވާ ވާހަކަ ރައިވަރުތަކެއް މިރައިވަރުތައް ހެއްދެވީ ބަނޑޭރި ޙަސަންމަނިކުފާނެވެ
ދީވާލުޕާ
ނ (1) ކުޑަކުދިން މީހުނާއި ތަތްވެގެން ވަކިނުވެ އުޅެންފެށީމާ ބުނެއުޅޭ ބަހެއް މިސާލު: މީނާއެކޭ ދީވާލުޕާއެކޭ އެއްގޮތެވެ (2) އިންސާނެއްގެ ސިފައިގައި އޮންނަކަމަށް ބުނާ ޚިޔާލީ އެއްޗެއް މީގެ ތިރީބުރި އޮންނަކަމަށް ބުނެވެނީ ވާވެފައެވެ
ދީފައިހިފުން
މ (1) މަސްބާނާއިރު އެންގަނޑުކާން ދިނުމަށް ތަންކޮޅެއް ދޫކޮށްފައި ދެން ދަމައިގަތުން (2) މަޖާޒު: އަނެކަކަށް ރަނގަޅަށް ފުރުސަތުދީފައި ތިމާގެ ބާރުގެ ދަށަށް ގެނައުން ނުވަތަ ބައްދައިލުން
ދީލިކަޑަވުން
މ (1) އޮޑިދޯނިފަހަރު ދީލިގެންގޮސް ރިޔަލުން ވައިހުސްވުން (2) މަޖާޒު: ކަމެއް ރަނގަޅަށް ކުރަން އުޅެގެން އޭގެ ހައްދުން ނައްޓައިލުން
ދުށިން
ނ (1) ކުޑަދޫންޏެއް މިދޫނިއުޅެނީ ފަޅުމައްޗާއި ގޮނޑުދޮށުގައެވެ (2) ދުށުން މިބަސް ފުރަތަމަ ފަރާތަށް އެކަހެރިކޮށް ނުވަތަ ގިނަކޮށް ނިސްބަތްވާގޮތަށް ބުނެވޭ ނިމިނިމުނުކަން
ދުނބުހި
ނ )ޅ ( ފަންޑިތަވެރިން ކިޔަވާ ކިޔެވެއްޔެއް މިއީ އިހުގައި އަންހެނުން ވިހެއުން ދަތިވެގެން ކިޔަވާ ކިޔަވެއްޔެކެވެ
ދުނބުރި
ނ (1) އަނބާވައްތަރުގެ ވަކެއްއަޅާ ފަތްބޮޑު ގަހެއް. މިއީ ގެދޮރު އަޅާއިރު މުޑީގެ ގޮތުގައްޔާއި ބިތްގެތުމަށާއި ފުރާޅު ބަނުމަށް ދަނޑިޔަށް ބޭނުންކުރާ އެއްޗެކެވެ މިއީ ވަރަށް އަވަހަށް ހެދޭ ގަހެކެވެ (2) މިގަހުގައި އަޅާވައް (3) މިގަހުގެ ލަކުޑި
ދުނބުރިފަތުބަޑިޖެހުން
ނ ރޯދުނބުރިފަތް އަލިފާނަށް ލީމާ ހޫނުގެ ސަބަބުން އެފަތުން ތަންތަން ފުއްޕަމުންދާއިރު އަޑުގޮވުން
ދުނބުރިގުދާ
ނ ދުނބުރިއެއްގައި އިލޮށިން ހަތަރުފައި ޖަހައިގެން ކުޑަކުދީން ކުޅެން ހަދާ އެއްޗެއް
ދުނި
ނ (1) ހެވިކަމުގެ ގޮތުންނާއި ހަނގުރާމައިގެ ތެރޭގައްޔާއި އެއްގަމު ކެޔޮޅުކަމުގައި ދުނިދަނޑީގެ ބާރުން ފޮނުވާތީރު (2) އައިނުގެ އޮނިގަނޑު ނުވަތަ ފައިކަށި (3) ކުޑައިގެ ފޮތިގަނޑު ހަރުކުރާދުނި ގަނޑުން އެކަތި (4) އަތޮޅުގެ ރަށްތައް އެތުރިފައި ހުންނަ ބޭރުބުރު (5) ވޮއްޑުންޏެއްހެން އޮންނަ ބުރުފަޅި (6) ދެއެއްޗެއްއޭގެ އަމިއްލަޒާތުގައި ކައިރިވިޔަނުދިނުމަށް ނުވަތަ ދުރުވިޔަނުދިނުމަށް ހަރުކޮށްފައި ހުންނަ ނަރުކޮޅު ނުވަތަ އެތިކޮޅު (7) ގުޑީގެ އޮނިގަނޑުން ބައެއް
ދުނިރުވުން
މ (1) ދުނިދަނޑީގެ ވަރައިގައި ދުނިއެޅުން (2) ދުނިފޮނުވައިލުމަށް ތައްޔާރުކުރުން