radheef.info
ރަދީފު


ދިޔަ
ނ (1) އަންހެންދަރިފުޅު (2) މޭވާއާއި ގަސްގަހާގެހީގެ ބާވަތްތައް ފެލައިލީމާ ނުކުންނަ ދިޔާބައި (3) ލައިގެންކާއެއްޗެހީގައި ހުންނަ ދިޔާބައި (4) )މ ( ރިހަ (5) ހަށިގަނޑުގެ ތަންތަން ނުބައިވެގެން ނިކުންނަފެން (6) ބޮޑުވެކުޑަވާ ފެންގަނޑު (7) ކާށީގެ އެތެރޭގައި ހުންނަފެން (8) ދިއުން މިބަހުގެ ނިމިނިމުނުކަން (9) ޙައްޤަކާ ނުލައި މީހެއްގެ ފުރާނަޔަށް ނުވަތަ ގުނަވަނަކަށް ގެއްލުމެއް ދިނުމުގެ ސަބަބުން ޝަރުޢީގޮތުން ދޭންޖެހޭ އަގު
ދިޔައެރުން
މ (1) އޮޑިދޯނި ފަހަރުގެ ބަނޑުފިލައިގެ ތަނަކަށް ލިބޭ ގެއްލުމަކުން އާދަޔާ ޚިލާފަށް ފެން އެރުން (2) އޮޑިދޯނި ފަހަރު ދަތުރުކޮށްފައިދާއިރު މަތިކަން މަތިން އެތެރެއަށް ލޮނުއެޅުން
ދިޔަވަރަށްބެލުން
މ ދިޔަވަރުފޫދެންދެން ނުވަތަ ދިޔަވަރު ހިކެންދެން ލަސްކުރުން
ދިޔަވަރަށްޖެހުން
މ ދިޔަވަރު ފޫދެންޖެހުން
ދިޔަވަރު
ނ މޫދުގެ ލޮނުގަނޑު ބޮޑުވެކުޑަވާ މިންވަރު
ދިޔަވަރުހިކުން
މ (1) ދިޔަވަރުކުޑަވުން. (2) ދިޔަވަރުފޫދުން މިބަހުގެ އިދިކޮޅު
ދިޔަވަރުހެޔޮވަރުކުރުން
މ ކައްކާއެއްޗެއްގައި ދިޔަވަރު ހުންނަންވީވަރަށް ދިޔަވަރު އެޅުން
ދިޔަވަރުބެލުން
މ ދިޔަވަރު ބޮޑުވެ ކުޑަވާވަރު ބެލުން
ދިޔަވަރުބޮޑުވުން
މ (1) ދިޔަވަރުފޫދުން (2) ދިޔަވަރު ހިކުމުގެ އިދިކޮޅު
ދިޔަވަރުއެޅުން
މ އެއްޗެހި ކައްކާއިރު ހެޔޮވަރުވާ ވަރަށް ފެން ނުވަތަ ފެންކިރު އެޅުން
ދިޔަވަރުވުން
މ އޮޑިދޯނިފަހަރު ވަދެނިކުމެވޭ ވަރަށް ދިޔަވަރު ބޮޑުވުން
ދިޔަވަރުފޫދުން
މ ދިޔަވަރު ބޮޑުވުން
ދިޔަވަރުގޮނޑުޖެހުން
މ ދިޔަވަރު އެންމެ ބޮޑުވާންވީވަރަށް ބޮޑުވުން
ދިޔަވަތް
ނ ފުރާދުއްވާ އެއްޗެހީގައި ދިޔަހިއްކަން ހުންނަވަތް
ދިޔަވުން
މ ކަނޑުގައި ދުއްވާ އުޅަނދެއްގެ ފެނުގެ އަޑީގައި ހުންނަބައިގެ ތަނަކަށް ލިބޭ ގެއްލުމެއްގެ ސަބަބުން އެތެރެއަށް ދިޔައެރުން
ދިޔަމުޑޮޅި
ނ ރުއްގަލުބޭހަށް ބޭނުންކުރާ ފަތްޕިލާވެލީގެ ބާވަތެއް މީގެފަތް ހުންނާނީ އޮފުކޮށް ތެޔޮކޮށެވެ ހިމަދިގުގޮތަކަށެވެ
ދިޔަފުރަސޫތާ
މ )ބދ ( ގަރުބަގަތުން
ދިޔަފެލުން
މ ދިޔަނެރުން
ދިޔަދިނުން
މ (1) ދިޔައިގެ ގޮތުން ދޭންޖެހިފައިވާ އެއްޗެއް ދިނުން (2) ދިޔަ އަދާކުރުން (3) ދާން ދޫކޮށްލުން (4) ދިއުމަށް ހުރަސްނޭޅުން
ދިޔަދޮއްވާ
ނ )ގ ( ދިޔަދޮވި
ދިޔަދޮވި
ނ ފުރާޅުން ފައިބާފެން ވަކިދިމާއަކަށް ގެންދިއުމަށްޓަކައި އަސްކަނިދަށުގައި ހަރުކޮށްފައި އޮންނަ އެއްޗެއް މިހަދައިފައި ހުންނަނީ ޓިނާއި އެސްލޯން ފަދަ ތަކެތިންނެވެ