radheef.info
ރަދީފު


ކުޅި
ނ (1) އެއްގަމުގައި ހެދިފައި ހުންނަ ފެންގަނޑު. (2) ހެވިކަން ފަރިތަ ކުރުމަށް ކުރާކަންތައް މީގެ ކިތަންމެ ބާވަތެއް ހުރެއެވެ. (3) ބައެއްކުޅިވަރު ތަކުގައި ވަކި ހަމަތަކެއްގެ މަތިން ބަދަލުކުރަމުން ގެންދާ ފިޔަވަޅުތަކުގެ ތެރެއިން ފިޔަވަޅެއް މިސާލު: ލަނގިރި ޖެހުމުގައި މާފަތިން ކުޅިހަދައި ނިމިގެން ކުރުދަނޑިއަށް ބަދަލުކުރުން. (4) ރާޒުވާއާއި ފަޗިސްފަދަ ކުޅިވަރުކުޅޭން ހަދައިފައި ހުންނަ އެއްޗެހީގެ ތެރެއިން އެކަތި (5) އެކި ބާވަތުގެ ބަޑިކުޅި ހަދާން ތައްޔާރުކޮށްފައި ހުންނަ ބޭސްގަނޑު (6) ނއ މިރުހުގައި ހުންނަ ރަހަ
ރާވެރިއެއްގެ ދަރިއަކަށްވެސް ހަތަރެތިން އެކަތި އޮންނާނެއެވެ
(މުސްކުޅިބަހެއް) މީހަކަށް ކެއްސެއް ނުވަތަ އަނިޔާއެއް އެއްފަހަރަށްވުރެ ގިނަފަހަރު ލިބޭގޮތްވެއްޖެނަމަ ބަދަލުހިފުމުގެ ގޮތުން ބުނެއުޅޭ ބަހެއް
ރާތީބު
ނ (1) ޞޫފީ އެކިއެކި ޖަމާއަތްތަކުގެ މީހުން އެކިއެކި ރޭރެއަށް ކިޔައިއުޅޭ މަދަހަ އާއި ޒިކުރު މިސާލު: ޙިދާދުރާތީބު ޖަލާލީ ރާތިބު (2) އިށީނދެތިބެ ޢަރަބިޅެން ކިޔަމުން ކުޅޭކުޅިވަރެއް މިސާލު: (ހ) ބޮޑުނަވު ރާތިބު (ށ) ކުޑަނަވު ރާތިބު
ކޯޑި
ނ (1) ރަށްފުށުގައި ކުޅޭ ކުޅިވަރެއް. މިއީ ބޮޑުޢީދުގެ ތެރޭގައި ކުޅެއުޅޭ ކުޅިވަރެކެވެ. (2) ކޯޑިކުޅޭއިރު ރުކެއްގައި ނުވަތަ ދަނޑިއެއްގައި އެލުވާއެތި މީގައި ހުންނަނީ ވަޅިފަންކޮށައިފައެވެ މިހާރަކަށް އައިސް ވައްތަރު ވައްތަރުގެ ރީތި ކަރުދާހުން އެއްޗެހި ހަދައި އެލުވާފައި ހުރެއެވެ
ކޯޑިކުޅުން
މ ރަށްފުށުގައި ބޮޑުޢީދުގައި ކުޅެއުޅޭ ކުޅިވަރެއް. މިކުޅިވަރު ކުޅޭއިރު ފިރިހެންކުދިން ކޯޑި ހަދައިގެން ކުޅިވަރުކުޅެމުން )ލަވަކިޔައިނަށަމުން( ހުސްމައިދާނެއް ކަހަލަތަނަކަށް )ކުޅޭބިމަށް( ގޮސް މަޑުކޮށްލައި އެތަނުގައި ކުޅިބަލަންގޮސްތިބޭ އަންހެންކުދިންގެ ތެރެއިން ކުއްޖެއްގެ ބޮލުގައި ކޯޑިޖައްސައިލަނީއެވެ. ދެން ކޯޑިގެންގޮސް ރުކެއްފަދަ ދިގު އެއްޗެއްގައި އަތްނުފޯރާ ހިސާބު މަތީގައި އެލުވަނީއެވެ. މިކޯޑި ކަނޑައިދޭނީ އަންހެން ކުދިންގެ ފަރާތުން ކަނޑައަޅާ ފިރިހެންކުއްޖެކެވެ. ދެން ފިރިހެންކުދިން އެކޯޑި ކަޑައިދިން ފިރިހެންކުއްޖާގެ ގައިގައި އަޅިދެލި ކުރަހައިގެން ގަންހިންގާގޮތަށް މުޅިރަށުގައި ހިންގުވައިފައި ގެނެސް މޫދަށް ލަނީއެވެ. އެއަށްފަހު އަންހެންކުދިން އެކުއްޖާ މޫދުންއަރުވައިގެން ގެންގޮސް ފެންވަރުވައި ނަލަހެއްދުވުމަށްފަހު ކޯޑިޖެއްސި އަންހެންކުއްޖާއާއި ދެކުދިން އަތުގުޅުވައިގެން ކުޅޭބިމަށް ގެންދާނީއެވެ
ކޯޑިކެނޑުން
މ ކޯޑިޔޭ ކިޔާ ކުޅިވަރުގައި ކޯޑިގެންގޮސް އެލުވީމައި އަންހެނުންނަށް އެކޯޑިބާލައިދިނުން
ކޯޑިޖެހުން
މ (1) "ކޯޑި" ކުޅުމޭ ކިޔާކުޅިވަރުގައި އަންހެނެއްގެބޮލުގައި ކޯޑިޖައްސައިލުން (2) "ކޯޑި" ކުޅުން
ކޯޓު
ނ (1) ވިލާތު ހެދުމުގެ ތެރޭގައި ގެންގުޅޭ ދެފަރާތުގައި ޖީބުލައިފައި ހުންނަ އަތްގުދުކުރި ބަނޑުފެޅި ލިބާސް (2) ޝަރީޢަތް ކުރާ އިދާރާ (3) ތާސްކުޅެގެން އެއްއަތްބައިވެސް ނުލިބުނީމާވާދެރަ (4) ބައެއްކުޅިވަރު ކުޅުމަށް ރޮނގުދަމައި ވަކިކޮށްފައިވާތަން މިސާލު: ޓެނިސްކޯޓް
ކޯޗު
ނ ކުޅިވަރުގެ ތަމްރީނުދޭ މީހާ
އައްޑަނަކޮށި
ނ (1) ކަނޑި އައްޑަނަ ހިފައިގެން ކުޅި ޖަހާކޮށި (2) "ކޮށި" ބަލާ!
އައްޑޫކޮށި
ނ (1) އައްޑުއަށް ނިސްބަތްވެގެން ނަން ކިއިފައިވާ ކުޅިޖަހާ ދަނޑިކޮށި (2) " ކޮށި" ބަލާ!
ވޮލީބޯޅަ
ނ ދާގަނޑެއްގެ މަތިން ދެފަރާތަށް ބޯޅަޖަހައިގެން ބިމުގައި ބޯޅަނުޖައްސައި އަތުން ކުލޭ ކުޅިވަރެއް މިކުޅެނީ ކޯޓެއްގައެވެ
ހޮޅިކޮށި
ނ އިހުގައި ކުޅި ޖަހައި އުޅުނުކޮށި ކޮށީގެތެރެއިން ފަސްވަނަ ކޮށި އެއީ އައްޑަނަ ކޮށްޓެކެވެ
ހޮޅުގަނޑު
ނ (1) ކަނޑައިލައިފައި އޮންނަ ކަށިކެޔޮ ގަސްބުރި (2) ރާއްޖޭގައި ހަދައިފައި ހުންނަ ހަންނުޖަހާ ގިރުނބާ (3) މަޖާޒު: ދަތްވެރިފައި ހުންނަ މުސްކުޅިޔާ
ހޮވާބައި
ނ މަންޑިއާއި ބޮނޑިއާއި ކުރިކެޓާއި ބަށި ފަދަ ކުޅިވަރުގައި ކުޅޭބައިނޫން އަނެއްބައި
ހޮވުން
މ (1) ބިމައްވެއްޓިފައި ހުންނަ ބައެއްތަކެތިނެގުން (2) އެތަކެއް ބާވަތުގެ އެއްޗެހި އެއްވެފައި ހުރިތާކުން ވަކިބާވަތެއްގެ އެއްޗެހި ނެގުން މިސާލު: )ހ( ހަނޑޫ ހޮވުން (3) ގެއްލިފައި ހުންނަ ތަކެތި ފެނިގެން ނެގުން (4) ވަކިކަމަކަށް ބަޔަކު ނުވަތަ މީހަކު އިޚްތިޔާރުކުރުން (5) ބައެއް ކުޅިވަރުގައި ކުޅޭ ބައިނޫން އަނެއްބައިގެ މީހުން ކުރާކަންތައް މިސާލު: ކުރިކެޓް ކުޅޭއިރު ބޯޅަހޮވުން މަންޑިކުޅޭއިރު ފޯލި ހޮވުން
ނަރު
ނ (1) މަޢުދަނީ ބާވަތަކުން އުފައްދާ ހިމަފަށް. (2) ބޮނބި، ކަށިކެޔޮ، ތޮރާ، މިފަދަތަކެތީގައި ހުންނަ ހިމަ ހަރު ފަށް. (3) މިއުޒިކު ކުޅޭސާމާނުގައްޔާއި ކުޅިވަރުކުޅޭ ބައެއް ކަހަލަ ރެކެޓްގައި ފުރާފައި ހުންނަ ފަށް (4) ހިމަ ފަށްފަށަށް ވާގޮތަށް ތައްޔާރުކޮށްފައި ހުންނަ ބައެއް ކާތަކެތި މިސާލު: (ހ) ހަލުއިދާނަރު (ށ) ފަޅޮލު އަސާރައިގެ ނަރު (5) ވެޔޮވެލުގެ ފަތްވަޅުން ފަޅައިފައި ހުންނަ ހިމަފަށް (6) ފުރާދުއްވާތަކެތީގެ ހުންގާނުގައި މާދާއަޅުވަން މައްޔަލުގައި ހަރުކޮށްފައިހުންނަ ލޯފޯލި (7) (ބދ) ހިމަކަން
ނަރެއްހާތަން ދޫކޮށްލިއްޔާ ކެނބެއްހާތަން ދަމައިގަންނާނެ
(މުސްކުޅިބަހެއް) ޤާނޫނާއި ގަވާއިދުފަދަ ކަންކަމަށް ކިތައްމެކުޑަ ލުޔެއް ދިނަސް ލިބުނު ލުޔަށްވުރެ ބޮޑަށް އެލުއީގެ އެކަށީގެންނުވާ ފައިދާ ނަގާނޭ ބުނުމަށް ބުނެއުޅޭ ބަހެއް
ނައިބުކަމާ ހިނގުން
މ ރަޖަބުމަހު ހަވަނަދުވަހު ދައުލަތުން ބޮޑު ރަސްމީ ޖަމާއަތެއް ފޮނުވައިގެން ހަތަރުއަވަށު މައިޒާންގޭދޮށުގައި ދީނުގެ އަމުރު މަޢުރޫފު ކުރުން. މި ޖަމާއަތް އެކުލެވިގެންވަނީ ބޮޑުބޭކަލުން ޚަތީބު ބޭކަލުން ފަނޑިޔާރުގޭ ނާއިބު ބޭކަލުން މަލިން ބޭކަލުން އަސްކަރު މުސްކުޅިން މަޖިލީހަށް އަރާބޭކަލުން މުދިން ބޭކަލުން ދޭވާނީން މިބޭބޭކަލުންގެ މައްޗަށެވެ
ނަވަށްކުރާބާރު އެނގޭނީ ކެނބަށެވެ.
(މުސްކުޅިބަހެއް) ހިނގާ ޚަރަދާއި ހޭދަވާ ފައިސާ އެނގޭނީ އެކަމާ ހަވާލުވެގެން ހުންނަ މީހަކަށްކަން ދޭހަކޮށްދޭން ބުނެއުޅޭ ބަހެއް
ނަގާހައި ވިލަޔަކުން ފެނެއް ނާންނާނެއެވެ. ޖަހާހައި ގުގުރިއަކުން ހޮނެއް ނާޅާނެއެވެ.
(މުސްކުޅިބަހެއް) (1) ކުރިމަތި ވެދާނެކަމަކަށް ހީކުރެވުނު ނުރައްކާތެރިކަމެއް ނުވެދިޔުމުން އެކަމާގުޅިގެން އެކަންނުވިކަން ދޭހަކޮށް ދިނުމަށް ބުނެއުޅޭ ބަހެއް (2) ކުރިމަތިވަމުންއައި ކަމަކުން ނުކުންނާނެކަމަށް ހީކުރި ނަތީޖާ ނުނިކުތުމާ ގުޅިގެން ބުނެއުޅޭ ބަހެއް