radheef.info
ރަދީފު


ގައި
އ ހާލު ނުވަތަ ތަން ނުވަތަ ވަގުތު ބަޔާންކުރުމަށް ބޭނުން ކުރާ އަކުރެއް މިސާލު: )ހ( ހަތްގަޑި ފަނަރައިގައި )ށ( މޭޒުދޮށުގައި )ނ( ބޭރަށް ހިންގުމުގައި
ހީލި
ނ (1) ގިލިގިލި ކޮއްޓީމާ ހަށިގަނޑަށް އެވާގޮތް (2) އުޅަނބޮށީގެ ހީލިކަށިގަނޑުތަނަކު ޖެހުނީމާވާގޮތް (3) ނުރައްކައު އުސްތަންތާގައި މީހުން ހިނގާތަން ފެނުނީމާ ބައެއް މީހުންގެ ދަށްފަޔަށް އެވާގޮތް (4) ހަރުދެއެތިގަނޑު ކޭރުވީމާ އިވޭ ބާވަތެއްގެ އަޑަކުން ބައެއް މީހުންގެ ދަތަށް އެވާގޮތް (5) ޖިންސީ އެދުންވެރިކަން އައުމުން އަންހެނުންގެ ކުރިމަތި ފަރާތަށް އެވާ އިޙްސާސް
ހީލިކަށިގަނޑު
ނ އުޅަނބޮށި ހުޅުގައްޔާއި ކަކުލުގައިވާ ކަށިގަނޑެއްގެކޮޅު އެކަށިގަނޑު ތަނެއްގައި ޖެހޭގޮތަކުން ބައެއްފަހަރު ވަރަށް ހީލިކަރުވާނެއެވެ
ހުހި
ނ ދިވެހިރުއް ފަދަ ރުއްރުކުގައި ގަންނަ ތަކެތި ހަރުވަމުން އަންނައިރު އެތެރޭގައި ކާން ކަމުދާ އެއްޗެއްނެތި އަނަރޫފަ ވެފައިވާ ވައް
ހުހިވައް
ނ މޫދުގައި އުފެދޭ ނުހަނުލުއި މަޑުއެއްޗެއް. މީގެ އެތެރޭގައި ވަރުވަރުގެ ލޯވަޅުތައް ތޮރުފިފައި ހުންނާނެއެވެ. ބޭރުގައި ހުންނަ ކުރަކި ކަމަކާއި ތޫނުކަމަކުން އެއްޗެހި އުނގުޅައި ސާފުކުރުމަށާއި ގައި އުނގުޅުމަށް ގެންގުޅެއެވެ
ހުހިގަތުން
މ ރުއްރުކުގައި ހުހިޖެހުން
ހުހިޖެހުން
މ ރުއްރުކުގައި ހުހި އައުން
ހުށި
އކ ކުރާ އަމުރެއްގެ ފަހަތަށް އިތުރުކުރާ އަކުރެއް މިސާލު: ނަމާދަށްޙަރަމް ބަނުމުގެ ކުރީގައި ޤިބްލައަށް ކުރިމަތިލާހުށި
ހުށިގެނޑި
ނ )ސ ( އެއްލަކުޑި ގަނޑަކުން ދެފައި ހުންނަގޮތަށް ހަދައިފައި ހުންނަ ތިރިގޮނޑި މިއީ އާއްމު ގޮތެއްގައި ބަދިގެދޮށުގައި ބޭނުންކޮށް އުޅޭ އެއްޗެކެވެ
ހުށޫ
އ ހުށި މިބަސް ފަދައިން ކުރާ އަމުރެއްގެ ފަހަތަށް އިތުރުކުރާ އަކުރެއް މިސާލު: ނަމާދަށް ހަރަމްބަނުމުގެ ކުރީގައި ޤިބުލައަށް ކުރިމަތިލާހުށި ނުވަތަ ކުރިމަތިލާހުށޫ
ހުނގު
ނ ގަހެއްގެކިރު މިއީ ބޭހަށް ގެންގުޅޭ އެއްޗެކެވެ މީގައި ޒަވިވަހެއް ދުވާނެއެވެ
ހުނގުމަސް
ނ ފަރުމަހުގެ ބާވަތެއް މިމަހުގެ އަނގަހުންނަނީ މަހުގެ މައްޗަށް ވާގޮތަށް ތެދަށެވެ މަހުގެ ކަރުތާފަތް ގަނޑުގެ ތިރީބައިގައި ރާޅުކަމެއް ހުރެއެވެ މަހުގެ ހަމުގައި ރާޅުކޮށް ހުންނަ ކުދި ހުޅުނބުތަކެއް ހުރެއެވެ ނަގޫފަތުގެ ދެކޮޅު ފަހަތަށް ދިގުކޮށް ހުރެއެވެ މިމަހުގެ ކުލައަކީ ރަތްކުލައެވެ
ހުނގުގަސް
ނ އިރުމަތީގެ ޤައުމުތަކުގައި ހެދޭ ކެރެޓްއާއިލާގެ ގަހެއް މިގަހުން ނުބައިވަސްދުވާ ތަތްކިރެއް ނެގެއެވެ އެކިރަކީ ބޭހަށް ބޭނުންކުރާ އެއްޗެކެވެ އެއަށް ކިޔަނީ ހުނގެވެ
ހުނަރުވެރިވުން
މ (1) ޙިކުމަތްތެރިވުން (2) ފަންނުވެރިވުން (3) ތަކެތި ހެދުމުގެ ގޮތުން ވިސްނުންތެރިވުން (4) ކަންތައްކުރުމުގައި ފާޑުވެރިވުން
ހުނިހައް
ނ ފޫއެނބުރީގެ ވައްތަރެއް މިއީ ދޮންކުލައިގައި ހުންނަ ވަރަށް ތުނި ބޮއްޔެކެވެ
ހުނިހުނގޫ
ނ ބިލެއްގަނޑުގައި ހުނިޖަހައިފައި ހުންނަތަން ހުނިޖަހައިފައި ހުންނަނީ ބިލެތްގަނޑު ހިމަކޮޅުގައެވެ
ހުނިފަތް
ނ (1) ހުނިހުނގޫ (2) ބިލެތްގަނޑުގައި ހުނިޖަހައިފައި ހުންނަތަން
ހުނިލުން
މ (1) ދުފާއިރު ބިލެތުގެކުޅިމަރާން ހުނިކޮޅެއް އަނގަޔަށްލުން (2) އުވަފުރާނައިގެން ނެގޭހިމުންބައި ފެނާއެއްކޮށް އޮލަކޮށް ގިރައި ތަންތާގައި ހޭކުން (3) ބައެއް ބާވަތުގެ ކާތަކެއްޗަށް ކާށިހުނި އެޅުން
ހުނިގުރާބު
ނ ދުފާހުނިއަޅާން ބޮއްކުރައެއްގެ ސިފަގައި ލަކުޑީން ހަދައިފައި ހުންނަ ކުޑަކުޑަ އެއްޗެއް
ހުނިގޮނޑިދޫނި
ނ (1) ހުނިގޮނޑީ ތިލަނޫންހައިތަން. (2) ހިކި ބިމުގެ ވިނަގަނޑުމަތީގައި މަސްކާށި ދޫނިހެން އުޅޭ ހިމަދިގު ހަލުއި ދޫންޏެއް
ހުނިގޮނޑިތިލަ
ނ ހުނިގޭނުމަށްޓަކައި ހުނިގޮނޑީގައި ޖަހައިފައި ހުންނަ ފުށްކެނޑި ތިލަ