radheef.info
ރަދީފު


ތީ
އ (1) ތިޔައީ )ދުރުގައިވާ އެއްޗަކީ ކޮން އެއްޗެއްކަން ބުނެދިނުމުގެ ގޮތުން ބޭނުންކުރާ ބަހެއް.( މިސާލު: ތީ އަހަރެންގެ ގަލަން. (2) ހިނގީތީ ހިނގިކަން ދައްކައިދިނުމުގެ ގޮތުން ބޭނުންކޮށްއުޅޭ އަކުރެއް. މިސާލު: ނޭންގީތީ ނާދެވުނީ. (3) ޔަތީ މިއަކުރު ކުރުކޮށް ބުނާގޮތް މިސާލު: ނޭންގީތީ ނާދެވުނީ
ބޭންދުން
މ (1) އިށީނުން މިބަސް ކުރުވުމުގެ މާނައިގައި ބުނާގޮތް )އިށީނދުވުން( (2) ޚިތާނުކުރުން (3) ވަކިތަނަކުން ނުނިކުމެވޭގޮތަށް މީހަކު ތަނެއްގައި ވަގުތީ ގޮތުން ހިފެހެއްޓުން
ބޭރެ ހެރަހަ
ނ )ޏ ( (1) އެންދަމާން ފައްތައިފައި އޮންނަ ދަލުގެ އަރާމަތީކުރެވި (2) މަތިވަޑާންގަނޑުގެ ކޮޅު ބިތުގައި ހުރަހަށް އަޅާ ދެވަކަރު
ބޭތަރުތީބު
ނ )ސ ( ތަރުތީބުނެތް
ބޭލާ
ނ މިޔުޒިކުގެ އާލާތެއް މީގެ މައިގަނޑު ބައިތަކަކީ ބަޓަން ލައިގެން ހަދައިފައިވާ ފޮއްޓަކާއި އެފޮއްޓަށް ހަރުކޮށްފައި އޮންނަ ދަނޑިއެކެވެ މީގައި އާންމުކޮށް ހުންނާނީ ހަރުނަރު ފުރައިފައެވެ މީގެއަޑު ނެރޭނީ މިނަރުތައް އޭތީގެ ދަނޑިޔާލައި އިނގިލި އޮބައި ކެހެރި ނުވަތަ އެފަދަ އެއްޗެހިވާންކޮށް ފުރައިފައި އޮންނަ ދަނޑިއެއް ނަރުތަކުގައި ކާއްތައިގެންނެވެ
ބޭލުން
މ (1) މަތީގައި ހުރިއެއްޗެއް ތިރިކުރުން. (2) އެއްގަމުގައި އޮތްއެއްޗެއް ކޮށްޕައި މޫދަށް ނުވަތަ ފެންގަނޑަކަށްލުން (3) ހަށިގަނޑުން ފަޅައިފައި ހުންނަ އިސްތައްޓާއި ގެރިބަކަރިފަދަ ޖަނަވާރުގެ ކެހެރި ތޫނު އެއްޗަކުން ކަހައި ފިލުވުން (4) ދަތުރުކޮށްފައި އައިމީހަކު އެއްގަމަށް ގެނައުން (5) ރަށުންބޭރަށް އަންނަމީހަކު ރަށުގައި ނުވަތަ ގެއެއްގައި ބެހެއްޓުން (6) އުޅަނދަކުން މީހަކު ނުވަތަ އެއްޗެއް އެއްގަމަށް ނުވަތަ އެހެން އެއްޗަކަށް ނުވަތަ ތަނަކަށް ގެންދިއުން (7) ދަތުރު ފަތުރު ކުރާ އުޅަނދަކުން ތަކެއްޗާއި މީހުން ހުސްކުރުން (8) ރަށެއްގައި ދިރިއުޅޭބަޔަކު އެރަށުން ބޭރުކުރުން (9) އެހެލުމުގެ އިދިކޮޅު )01( ކުޅިވަރުކުޅޭ ދަނޑަކުން ނުވަތަ ކޯޓަކުން މީހުން ނުވަތަ ބަޔަކު ބޭރުކުރުން
ބޮށިގަނޑަ
ނ )ސ.( (1) ވިހައިގެން އުޅޭ މީހުންނަށް ބޯންދޭން ތައްޔާރުކުރާ ބޭހެއް. މިއީ މަތިކަރާ ބޭހާއި ގަސްގަހުގެމޫ އެއްކޮށްގެން ހަދާ ބޭހެކެވެ. މިބޭހަށް "ބޮށިގަނޑަ" މިހެން ކިޔަނީ މައިގަނޑު އެއްޗަކަށް ވަނީ ބޯށިގަހުގައި އަންނަ ޅަބޯށިގަނޑުކަމަށް ވާތީއެވެ. (2) ގަސްގަހުގައި އެއްތަނޑަކަށް ނުފޮޅި ހުންނަ މާގަނޑު
ބޮނބިފަޅި
ނ މެދުބުރަކަށިން މަތީގެ ދެފަރާތުގައި އުސްކޮށް އޮންނަތަން
ބޮނދު
ނ (1) ރާޒުވާކުޅިބައިގެވެރިކުޅި. (2) ކަނޑުމަތީގައި އުޅޭ ކުޑަވަރެއްގެ ދޫންޏެއް. މިދޫނީގެ ފިޔަހުންނާނީ ހަނިކޮށެވެ. ވަރަފަތް ތައް ހުންނަނީ ތޫރިކޮށެވެ. (3) މަޖާޒު: ރަނގަޅަށް ބޮޑުނުވެ ހުންނަމީހާ. (4) )ގ.( ލަނޑާ
ބޮނގަރަ
ނ ފަލޯ ބަނބުކެޔޮ ފަދަ ތަކެތީގައި މަދު ހަވާދުކޮޅެއް ލައިގެން ކައްކާ ލައިގެން ކާއެއްޗެއް
ބޮނޑަނަ
ގޮނޑުދޮށު ދޫނީގެ ބާވެތެއް. މިއީ ހަށިގަނޑު ބޮނޑިމަސް ތުންކުރު ދޫންޏެކެވެ. މިދޫނީގެ ދެފިޔައިގެ މަތީ ފަރާތާއި ބުރިކަށިމައްޗާއި ބޮލުތަލަމަތީ ގައި ހުންނަނީ އަޅިކުލައެވެ ކަރު ދަށުން ފެށިގެން ބަނޑުދަށާއި ފިނދުފަތް ހުންނަނީ ހުދުކުލައެއްގައެވެ ތުންހުންނަނީ ކަޅުއަޅި ކުލައިގައެވެ
ބޮނޑަންއިލޮލި
ނ ގޮނޑު ދޮށު ދޫނީގެ ބާވަތެއް. މިއީ ބޮނޑަނައާއި ވައްތަރު ދޫންޏެކެވެ. މީގެ ތުން ދިގުވެފައި ތުނބުގެކުރީކޮޅު ހުންނަނީ ތިރިއަށް ލެނބި ލައިފައެވެ. ތުނބުގެކުލައަކީ ކަޅުދަނބުކުލައެވެ ދޫނީގެ ބުރަކަށިމަތީގައި ހުންނަނީ އަޅި މުށި ކުލައެވެ ބަނޑުދޮށް ހުންނަނީ ހުދުކުލައެއްގައެވެ ފިޔައިގެ ކުރުފަތްބައިގެމަތީ ކައިރި ހުންނަނީ ހުދުކުލައިގައެވެ
ބޮނޑިކަނދޮޅު
ނ ކަނދޮޅުގެ ބާވަތެއް މި ގަހުގެ ފަތް ހިމަދިގުވެފައި ފެހިކުލަ ގަދަވާނެއެވެ ގަސް ވައްތަރުވާނީ ލިލީ ގަހާއެވެ ލިލީއަށްވުރެ ކުދިވާނެއެވެ މާ ހުންނާނީ ތިރީބައި ތާޅަފިލިމާ ހުންނަ ގޮތަށެވެ މަތީބައި ހުންނާނީ ލިލީމަލާ އެއްގޮތަށެވެ މަލުގެ ކުލަޔަކީ ހުދު ކުލައެވެ މިއީ ބޮޑު ފިޔާގެ ސިފައިގައި އޮންނަ ގޮނޑިއެއް އޮންނަ ކަނދޮޅެކެވެ
ބޮނޑިކުޅުން
މ އެތެރޭގައި ހޮއި ނޯންނަގޮތަށް ރަބަރުން ހަދައިފައި އޮންނަ ބޯޅަޔަކުން ކުޅޭ ކުޅިވަރެއް ކުޅުން. މިކުޅިވަރުކުޅޭނީ މީހުން ދެބަޔަށް ބަހާލައިގެންނެވެ. ކުޅޭނީ ބިންމަތީގައި ބޯޅަޖަހައިގެން މައްޗަށް އެރީމާ އަތުން ކަނދު ހުރަސްކޮށް ޖަހައިގެންނެވެ. މީގައި ސައްޕު ޖަހާނީ ފައިންނެވެ. އަތްމަތި ފޯލީގައި އަތް ޖެހިއްޖެނަމަ ނުބައިވެފައިތިބި މީހުން ދިރޭނެއެވެ
ބޮނޑިތާން
ނ (1) އެތެރެއަށް ބޭސްއަޅައި ފޮތީން ބަނދެފައި އޮންނަ ބޮނޑިޔެއް (2) ބޮނޑިތާންކުރާ ފޮތިގަނޑު
ބޮންތިރަތްކެޔޮ
ނ ފަތްކޭލުގެ ބާވަތެއް މިބާވަތުގެ ކެޔޮއަންނަ ގަހުގެ ބޮންތީގަޔާއި ދަޅީގައި ކުޑަ ރަތްކަމެއް ހުންނާނެއެވެ
ބޮންޑާފާނަ
ނ އޮޅުފާނައިގެ ބާވަތެއް. މިއީ އާދައިގެ ފާނައަށްވުރެ ބިޔަ ނިގޫފަތުގެ ކޮޅު އެއްވަރަކަށް ހުންނަ އަނގަ ބޮޑު ދަތްތޫނު ގަދަރަތްކުލައިގެ މަހެކެވެ. މަހުގެ ވަށައިގެން ގަދަ މުށިކުލައިން ކައިރިއެޅިފައި ހުންނަ ނޫކުލައިގެ ތިކިތަކެއް ހުރެއެވެ. އަދި ބުރިކަށިމަތީގައި ހުރަހަށްވާގޮތަށް ފުޅާ ދެތިން ގަޅި ހުރެއެވެ
ބޮކަރުމާ
ނ (1) ތާޅަފިއްޔެއްގޮތަށް ހުންނަ ރީނދޫކުލައިގެ މަލެއް މިމަލުގެ ތަނޑާވީ ކޮޅަށް ހިމަވެފައި މަލުގެ ކުރީގެ އެތެރެއަށް ހުންނަ ބައިފުޅާވާނެއެވެ މިބަޔާއެއްކޮށް މަލުގައި ފަސްފިޔަ ހުރެފައި އެއްފިޔަ އަނެއްފިޔައަށް ހުންނާނީ ވަކިވެފައެވެ މިމަލުގައި ބޮކަރު ވަހާގާތް މަޑުލުއި މީރުވަހެއް ދުވައެވެ މިގަހުގެ ފަތަކީ އަރިމަތީގައި ވަރަށް ގިނަ ތުނޑުލައިފައި ކޮޅަށް ތޫރިކޮށް ހުންނަ ހިމަދިގު ފަތެކެވެ (2) ތުނި ފޮނިތޮށިހެން ހުންނަ ބޮކަރުވެސް ދުވާ އެއްޗެއް މިއީ ދުން އަޅާން ގެންގުޅޭ އެއްޗެކެވެ
ބޮކުސާބޮނޑި
ނ ތަރުތީބު ކުޑަކޮށް ބަނދެފައި އޮންނަ ބޮކުސާ
ބޮކުސިން
ނ ކުޅިވަރެއްގެ ނަން މިއީ ވަކި ގަވާއިދެއްގެ މަތީން ދެމީހަކު ގޮށްމުށްކަވައިފައި އެކަކު އަނެކަކުގެ ގައިގައި ތަޅާ ތެޅުމެކެވެ
ބޮއި
ނ (1) ތަނެއް ނުވަތަ އެއްޗެއް ފާހަގަކުރުމަށްޓަކައި ފެންމަތީ އޮންނާނެހެން ހަރުކޮށްފައި ނުވަތަ އުޅަނދުފަހަރު އެޅުމަށް ފެންމަތީ އޮންނާނެހެން ހަރުކޮށްފައި އޮންނަ ކޮންމެ އެއްޗެއް (2) އުޅަނދުފަހަރު ތަނެއްގައި ނުވަތަ އެއްޗެއްގައި ޖެހިގެން ގެއްލުމެއްވިޔަ ނުދިނުމަށް ކައިރިފަށުން ބޭރުން އެލުވައި ހަރުކޮށްފައި އޮންނަ އެއްޗެއް (3) ބުއިން މިބަހުގެ ވާކަމާއި އަމުރު