radheef.info
ރަދީފު


ވެސް
އ (1) ދޭދޭ ބަސް ގުޅައިލުމުގައި ބޭނުންކުރާ އަކުރެއް. މިސާލު: އަޙްމަދު ވެސް އަނީސްވެސް އައެވެ. (2) އިތުރުކުރުން ހިމެނުން މިސާލު: އަހަރެން ވެސް ދާނަން
އެންދުން
މ (1) އަންދާނޭގޮތް ހެދުން (2) ނާށި ދަރުފަދަތަކެތީގައި ރޯކޮށްގެން އަލިފާނަށް ހެދުން (3) ކޮންމެވެސް ބައްޔަކަށްޓަކައި މީހުންގެގައިގެތަން ތަން ފިއްސުން (4) މެއިންހޫނުނެގުން
އެންދެރި
ނ ކަނޑުގައިހެދޭ ފަތް ނުހުންނަ ކަޅުކުލައިގެ ގަހެއް. މިގަހުގައި މުތްހުންނަ އިތާވެސް ހުރެއެވެ. ވަރަށް މަދުމަދުން މީގެ ހުދުކުލައިގެ ގަސްވެސްހުރެއެވެ. މީގެ ލަކުޑިއަކީ ވަރަށް އަގުހުރި ތަދުއެއްޗެކެވެ
އެރި
ނ (1) ރުކު އެޅުމާއި ބަނބުކެޔޮ ކެނޑުންފަދަ ކަންކަމުގައި ގަހަށް ރުކަށް އަރާމީހާއަށް އޮންނަބައި މިއީ ހަތަރެތިން އެކައްޗެވެ ކޮންނަ އެއްޗިއްސާއި ހޮވާ އެއްޗެހީންދޭ ބަޔަށްވެސް މިހެން ކިޔައެވެ (2) "އެރުން" މިބަހުގެ ނިމިނިމުނުކަން
އެރުން
މ (1) އޮއްސުމުގެ އިދިކޮޅު (2) އުދަވުން (3) ތިރިން މައްޗަށް ދިއުން (4) މޫދުން އެއްގަމަށް އައުން (5) އެއްޗެއްގެ ތެރެއަށް އަނެކައްޗެއް ވަނުން (6) އަތިރިމައްޗަށް ފޭބުން (7) އަތިރިއަށް ދިއުން (8) އަތިރިމަތީން އެއްގަމަށް އައުން (9) މޫދަށް ނުވަތަ އެހެންވެސް ފެންގަނޑަކަށް ފޭބުން )01( ރަސްމީ ބައެއް ކަންތަކާއި އޮޅިމެދުގައިނަމަ އެކަމެއްގައިވުން
އެރުވުން
މ (1) ތިރީން މައްޗަށް އެއްޗެއް ފޮނުވުން. މިސާލު: ގުޑިއެރުވުން ބެލޫނު އެރުވުން (2) މޫދުގައި ނުވަތަ ގޮނޑުދޮށުގައި އޮތް އެއްޗެއް އެއްގަމަށް ގެނައުން (3) އެއްޗެއްގެ ތެރެޔަށް އެއްޗެއް ބާރުކޮށް ވެއްދުން (4) މީހަކަށް އެއްޗެއް ދިނުމަށް މާތްބަހުން ބުނާގޮތް (5) ދުއްވާ އެއްޗަކަށް މުދާލުން (6) ބައެއް ޒާތުގެ ކެޔޮޅުކަން ކުރާން ބަރެއްލާފައި ނަނުފެއްތުން (7) މީހެއްގެ ނުވަތަ އެހެންވެސް ދިރޭއެއްޗެއް ފެންގަނޑަކަށް ބޭލުން
އެއްކަށިވީރު
ނ (1) ކަށިފަލަ ވަރުގަދަމީހާ (2) ބޯދާޚިޔާލުގައި އަތްދަނޑީގެ ކަށި އެއްވެފައި އަދި އަރިކަށީގެ ކަށިތައްވެސް އެއްވެފައިވާމީހާ
އެއްކައުވަންތަ
ނއ (1) އެއްވެސް މަޢުނައެއްގައި ޝަރީކަކުނެތް (2) އެއްވެސްކަމަކުން އެއްފަދަ އަނެކެއްޗެއްނެތް މިއީ ﷲ އަށް ޚާއްޞަ ސިފަފުޅެކެވެ
އެއްވަރެއްވެސް ނުވުން
މ (1) ކުރަން އުޅޭ ކަމެއްވާނެ އެއްގޮތެއްވެސް ނުވުން (2) މުޅިން ނާކާމިޔާބުވުން
އެއްވެސް
އ (1) އެކައްޗެއްވެސް (2) އެއްކަމެއްވެސް މިބަސް ބޭނުންކުރެވެނީ ނަފީގެ ގޮތުގައެވެ މިސާލު: އެއްވެސް ކަމަކު ނޫން އެއްވެސް ތާކު ނެތް
އެއްމެދު
ނއ ދެމީހަކަށް ނުވަތަ އެއަށްވުރެ ގިނަ ބަޔަކަށް އެއްވަރަށް ބެހޭންވާ. މިބަސް ގިނައިން ބުނެއުޅެނީ އަނބިމީހާވެސް އެއްޗެހި ހޯދުމަށް މަސައްކަތްކޮށް ތަކެތި ހޯދުމުގެ ސަބަބުން ދެމަފިރީންނަށް އެއްވަރަށް ބެހޭ މުދަލާ މެދުގައެވެ
އެއްފުޅައްމަތިންފުންމާލިބަކަރިއަނެއްފުޅައްމަތިންވެސްފުންމާލާނެއެވެ " )މިސާލުބަހެއް( އެއް ސާހިބަކަށް ހަރާން ކޯރުވީމީހަކު އަނެއް ސާހިބަކަށްވެސް ހަރާމްކޯރުވާނެއެވެ
އެއްގަމުއަރުމާޒު
ނ އައްސުލްޠާންއަލްމުޡައްފަރު މުޙަންމަދު ޢިމާދުއްދީން އުތުރު އަރުމާޒަށް ވަޑައިގަންނަވާންވެގެން އެރަދުންގެ ދަރިކަލުންނަށް އެއްގަމުގައި ހައްދަވައިދެއްވި އަރުމާޒެއް. މިއަރުމާޒު ހެއްދެވިގޮތަކީ ފުރޮޅުލާފައި އެއްގަމުގައި ދުއްވޭނޭހެން އެގާރަ ގުރާބު ތައްޔާރުކުރައްވައި އެގުރާބު ދަމާ ކަލާސީންނާއި ދަންޑަހެލު ބޭކަލުން ލައްވައި އެމީހުންގެ ވެރިޔަކު ލައްވައި އެމީހަކަށް ރަނަހަމާންތި ކަމަށް ކޮލިލައްވައި ގުރާބުތަކަށް އެއްގަމު އަރުމާޒު ބަޑިލައްވައި އެގުރާބުތަކަށް ރަސްމީ އުޅަނދުތަކަށް ހުންނަހައި ކަމެއް ހަމަކުރެއްވިއެވެ. އަރުމާޒު ކަލާސީންނާއި ދަންޑަހެލުންނާއި ރަނަހަމައިދި ބޭކަލަކު އޭގެ ކުރިއަކު ނުތިއްބަވައެވެ. ރަދުންގެ އަރުމާޒު ފުރާވަޑައިގަތުމަށްފަހު އެއްގަމު އަރުމާޒު ފުރާވަޑައިގަތީ މެދުޒިޔާރަތް މަގުން އިރުމައްޗަށެވެ. މިހެން ގޮސް އެކިއެކި ތަންތާ ރޭކުރައްވައި ކުޅިވަރު ކުޅުއްވައި ހައްދަވައެވެ. ދުވާލު ކަލާސީން ލައްވައި ރަށުތެރެ ތާހިރުކުރައްވައި މިބާވަތުގެ ކަންތައް ކުރައްވަމުން ވަޑައިގެން ރަދުންގެ އަރުމާޒު މާލެ ވަޑައިގަތް ދުވަހު އެއްގަމު އަރުމާޒުވެސް ގަނޑުވަރަށް ވަޑައިގަތީއެވެ. އޭގެ ފަހުގައި ކަލާސީންނާއި ދަންޑަހެލުން ހަވަރަށް ބައިކުރައްވާ އެމީހުންގެ ޚާއްޞަ މަސައްކަތަކީ ބަނޑުދިނުންކަމުގައި ހައްދަވައި މިއަރުމާޒުގެ ބަނޑޭރިން މިނާ މީހުން ކަމުގައި ހެއްދެވީއެވެ ދެފޮއިގައި ބަނޑުދޭން ފެށީ މީގެ ފަހުގައެވެ ކުރީގައި ބަނޑުދޭ ގޮތަކީ މަހަކު އެއްފަހަރު ކޮށާރު ދޮށަށް ބަލައިދިޔައިމާ ދެއްވަނީއެވެ މިއަރުމާޒަށް ވަޑައިގަތް ބޭފުޅަކީ ތާރީޚުގައި މަޝްހޫރު އިބްރާހީމް ރަސްގެފާނެވެ
އެއްގޮތަކަށްވެސް
(1) ދުވަހަކުވެސް (2) ފަހަރެއްގައިވެސް މިބަސް ބުނެއުޅެނީ ނަފީގެ ގޮތުގައެވެ
އެއްޗަކަށްހެދުން
މ (1) އެއްވެސް ކަމަކަށް ބޭނުން ނުހިފޭނޭހެން ހީވާ އެއްޗަކުން ބޭނުން ހިފާކަހަލަ އެއްޗެއް ހެދުން (2) އެއްވެސް ތަރުބިއްޔަތެއް ނެތި ހުރި މީހަކު ކޮންމެވެސް ކަމެއްގައި ބޭނުން ހިފޭނެގޮތް ހެދުން (3) ބޭނުމެއް ނުހިފިފައި ހުރި މީހަކު ކަމެއްގެ ތެރޭގައި ގެންގުޅޭން ފެށުން (4) މީހަކު އެއްވެސް މަޤްޞަދެއްނެތި ބުނެލި ބަހަކުން ނުވަތަ ކުރިކަމަކުން ރަނގަޅުގޮތުގައި ނުވަތަ ނުބައިގޮތުގައި އަނެކަކު އޭގެ ނަތީޖާ ނެރުން ނުވަތަ ނެރޭން އުޅުން
އެވަރުވުން
މ (1) އެގޮތްވުން (2) އެހިސާބަށް ކަން ކުރެވުން މިސާލު: މީހަކު ތާކަށްގޮސް އުޅެއުޅެ އެއްކަމެއްވެސް ނުވެގެން އައިމާ އޭނާ ދެރަކޮށްލުމުގެ ގޮތުން "މަދިޔަނަމަވެސް އެވަރުވެއްޖައިހޭ" ބުނެއުޅެއެވެ ދެމީހަކު ދޫނުކޮށް ހިފަމުންގޮސް މާބޮޑަށް ވަރުބަލިވީމާ "އެވަރުވީއިރުވެސް ދުލެއް ނުކުރެއޭ" ބުނެއުޅެއެވެ
އެވޭލާއަކުރު
ނ ދިވެސް އަކުރުގެ މުސްކުޅި އަކުރު
އެދުރުކަލޭގެފާނު
ނ އެދުރަކު މަޖިލީހަށް އެރީމާ ކިޔާނަން މިބަސް މާތްކުރުމަށްވެސް ބައެއްގޮތުގައި ކިޔައިއުޅެއެވެ
އެދުރުލަވަ
ނ (1) ފަސްފިޔަވަޅު ބެރާއި ސަމާގައި ޖަހާ ލަވައެވެ (2) ސަމާތާރަ ފަށާން ޖަހާލަވަ ސަމާތާރައިގައި ދަންފަޅި ބަލައިގަންނަ މީހުން އައިސް ފުރަތަމަ ޖަހާނީވެސް މިލަވައެވެ
އޮހޮ
އ (1) އެވަގުތު ވާނެހެން ހީނުވާ ކަމެއްފެނިގެން ހައިރާންވުމާއެކުގައި ނުވަތަ އަޖައިބު ވެގެން ބުނާ އަކުރެއް (2) ކަމެއް މަނާ ކުރުމުގެ ގޮތުންވެސް މިއަކުރު ބޭނުން ކުރެއެވެ
އޮހޯ
އ (1) އެވަގުތު ވާނެހެން ހީނުވާ ކަމެއްފެނިގެން ހައިރާންވުމާއެކުގައި ނުވަތަ އަޖައިބު ވެގެން ބުނާ އަކުރެއް (2) ކަމެއް މަނާ ކުރުމުގެ ގޮތުންވެސް މިއަކުރު ބޭނުން ކުރެއެވެ