radheef.info
ރަދީފު


ޖ
އ ތާނައިގެ ތޭވީސްސވަނަ އަކުރު
ފޫ
ނ (1) ބައެއް ކަހަލަ ކާއެއްޗެހި ގިނަ ދުވަސްވެ ހަލާކުވެގެން ނުވަތަ ވައި ބަންދުވެ ދުވަސްވެގެން އޭގައިޖަހާ ކަފަގޮތަށް ނުވަތަ ކެހެރި ފާޑަށް ހުންނަ އެއްޗެއް. މިއީ ދިރުން ހުންނަ ހުދުކުލައަކަށްދާ އެއްޗެކެވެ. ދުވަސް ވީވީހެން ކުލަ ބަދަލުވަމުންގޮސް ކަޅުކުލައަށް ބަދަލުވެއެވެ. (2) ދާ ހިއްލާ ހިކުނީމާ ގައިގަޔާއި ފޭރާމުގައި ހުންނަ ހިކިފައިވާ ލޮނު. (3) ޖަންބާއި ޖަނބުރޯލުފަދަ ތަކެތީގެ މަލުގެ ފިޔަ ވެރުނީމާ މޭވާއަކަށްވުމުގެ ކުރީގައި ހުންނަބައި. (4) އެއްޗެހި ހަރުލާގޮތަށް ހުންނަ ކޮންމެ އެއްޗެއްގެ އަޑީގެ ދެފަރާތް. މިސާލު: ތެލި ވަޅު ތާނގީ ދަޅުފަދަ އެއްޗެހީގެ ފޫ (5) މަސްއަރީގެ ނިމޭކޮޅު (6) ދަނޑި ނުވަތަ ރިތް ފަދަ ތަކެތީގެ ފަލަކޮޅު (7) ފިނދުމަސްގަނޑު (8) މޭވާއާއި ތަރުކާރީފަދަ ތަކެތީގެ ތަނޑު ހުންނަކޮޅު ނޫން އަނެއް ކޮޅު
ފޫހަރައިގެންއިނުން
މ ފިނދުމަސްގަނޑު ޖައްސައިގެން ދެކަކޫކޮޅަށް ޖަހައިގެން އިނުން
ފޫހަރުކުރުން
މ (1) ކޮޅަށްޖަހާ އެއްޗެހީގައި ފޫ ނުގުޑާގޮތަށް ގަދަކުރުން (2) މަޖާޒު: ތަނަކަށް ގަދަކޮށްލުން
ފޫހި
ނ (1) ކަމެއްގެ ނުވަތަ އެއްޗެއްގެ ނުވަތަ މީހެއްގެ މަތިން ހިތްކެނޑޭގޮތްވުން. (2) ކަންކަމާ ގަޔާވާގޮތް ނުވާ ނުވުން. (3) މީހެއްގައި ނުވަތަ އެއްޗެއްގައި ހުންނަ ސިފައަކުން ވާ ނުރުހެވޭގޮތް (4) ޠަބީޢި ގޮތުން މީހާއަށް އަންނަ ބަދަލަކުން ކަންކަން ކުރާހިތް ނުވެފާ ހުންނަ ހުރުން (5) ހިތްހަމަ ނުޖެހޭގޮތްވާ ވުން
ފޫބަރުވުން
މ މަޖާޒު: (1) މަސައްކަތަށް ބުރަހެލިވުން (2) ހެލިފެލި ވެއުޅުމަށް ކަންނެތްވުން
ފޫބުރި
ނ (1) ވާގަނޑުނޮޅި ޖަހާ ފުޅި މިފުޅި ހުންނާނީ މައްޗަށް ހިމަކޮށް ކަރެއްލައިފައި ތިރިޔަށް ފުޅާކޮށް ފޫހަމައަށެވެ (2) މައްޗާއި ފޫހުންނަ ބައެއް ކަހަލަ އެއްޗެހީގެ ތިރީބައި މިސާލު: ސިލުނބުގެ ފޫބުރި
ފޫބެއްދުން
މ މަޖާޒު: (1) ދެކޮޅު ޖެއްސުން (2) ދައްކާ ވާހަކަ ހަމަޖެއްސުން
ފޫޅު
ނ (1) އިންސާނުންގެ ބަނޑުގެ މެދުގައި އަޑިވެލާފައި ހުންނަތަން މިއީ ބަނޑުގައި އޮންނައިރު މަހުގެ ފޫޅުދަނޑި ގުޅިފައިވާ ތަނެވެ (2) ވިހާއިރު އޮންނަފޫޅު ދަނޑި ކަނޑާލީމާ އޮންނަ ތަންކޮޅު (3) މަޖާޒު: ބަލިކަށި (4) ވާދަކޮށްގެންވާ ދެރަ
ފޫޅުހިކުން
މ ކުއްޖާ ދުނިޔެއަށް އުފަންވާއިރު މަހާ ފޫޅާ ގުޅިފައިވާ ފޫޅުދަނޑިން މަސް ވަކިކޮށްލާއިރު ބާކީ ބާއްވާ ތަންކޮޅު )ފޫޅާ ގުޅިފައިވާ ތަންކޮޅު( ހިކުން
ފޫޅުންތިރި
ނ މަޖާޒު: ފަރުޖު
ފޫޅުކެނޑުން
މ (1) ކުއްޖަކު ދުނިޔެއަށް އުފަންވާއިރު އެކުއްޖާއާއި ގުޅިފައި އޮންނަ ފޫޅު ދަނޑި ވަކި ހިސާބަކުން ބުރިކޮށްލުން (2) މަޖާޒު : ނުދަނެހުރި މީހަކާ ކަމެއް މަތިކުރުން
ފޫޅުމާފޮށި
ނ ރާއްޖޭގައި ޑަކްޓަރީ އުޞޫލުން ފޫޅުމައިކަން ކިޔަވައިދެއްވުމަށްފަހު ފާސްވުމުން އެކަމުގެ ސަނަދާއެކު ދެއްވާ ކަމާބެހޭ ސާމާނު އަޅައިފައި ހުންނަ ފޮށި
ފޫކިބަ
ނ (1) ކާށި ބިދެފައި އޮންނައިރު ލޯ ނުހުންނަބައި (2) ފާރޮށިޖޯޑުގެ މަތީ ކިބަ (3) މަލާފަތް ފަދަ ތަކެތީގެ ދަށުކިބަ (4) ދެބަޔަކަށް ހަދާފައިވާ ތަކެތީގެ ވަތުކިބަ
ފޫކެހުން
މ މަޖާޒު: ބޮޑާ ދެއްކުން
ފޫއެޅުން
މ (1) ފޫވަކިން އަޅަންޖެހޭ އެއްޗެއް ހަދާއިރު ނުވަތަ އެ އެއްޗެއްގެ ފޫ ހަލާކުވުމުން އޭގެފޫ ހަދައި ހަރުކުރުން (2) ތޮރުފައިލައިފައި ނުކުތުން
ފޫތޭރި
ނ (1) މަތިންދާ އަލިގަނޑު (2) މަންޑި ކުޅޭއިރު ބާރަށްޖެހޭ ފޯލި
ފޫގެޅުން
މ (1) އަނދެފައިވާ މުންޑު ނުވަތަ ފޮށާ ފަދަ އެއްޗެހީގެ ތިރީކޮޅު އެއްފަށަށް ވާގޮތަށް ކުރިމައްޗަށް ބޮޑިކޮށްލައި އެބައި ދެފައި ދެގޯޅިން ފަހަތަށް ގެންގޮސް ފުރަގަހުން އުނަގަނޑުގެ ރޮދިގަނޑު ދަށަށް ޖެހުން (2) މަޖާޒު: ޢަޒުމާއެކު ކަމަކާ ކުރިމަތިލުން
ފޫގޮޅި
ނ ޙައިޟު ނުވަތަ ނިފާސްކަމުގެ ދުވަސްވަރު އަންހެނުންގެ ކުރިމަތިފަރާތު ދޮރު ބަންދުކުރުމަށް ޖަހާ ފޮތިގަނޑު
ފޫގޮޅިޖެހުން
މ (1) އަންހެނުން ޙައިޟުވެގެން އުޅޭއިރު ނުވަތަ ނިފާސްކަމުގެ ދުވަސްވަރު ލޭނުފައިބާ ގޮތަށް ފޮތިގަނޑަކުން ބަންދުކުރުން (2) ބައްޔެއްގެ ސަބަބުން ވައި ނުހިފޭ ނުވަތަ ނަޖިސް ނުހިފޭ މީހުން ފޮތިގަނޑަކުން ދޮރު ބަންދުކުރުން
ފޫޓު
ނ (1) ބާރައިންޗީގެ ދިގުމިން (2) މަޖާޒު: ގޯތި