radheef.info
ރަދީފު


އިހު
ނ (1) ވޭތުވެދިޔަ ޒާމާން (2) މިހާރުގެކުރި
ކާށިގެ
ނ އިހުގައި ކާށިލާން އަޅައިފައި ހުންނަގެ މުޑި ޖަހައިގެން މޫދުގައިވެސް ކާށިގެ އަޅައިއުޅެއެވެ
ކާރުދަވެރިން
ނ އިހުގައި ކާރުދަނަގާން ދައުލަތުގެ ފަރާތުން ފޮނުއްވާ މީހުން
ކާޅުކޮށުން
މ (1) އިހުގައި ކުޅި ހުއްޓާރޭރޭ މަސަލަސް ޖެހުމުގެ ބަދަލުގައި ހޮޅިކޮށީ މީހުން ކޮށްއުޅުނުކަމެއް (2) މަޖާޒު: އުނދަގޫކުރުން
ކާޅުތުން
ނ (1) ތިލޭރު އަތްކަން ކުރާމީހުންދުން ކިބަލަށް ފެންޖަހާން ގެންގުޅޭ އެއްޗެއް މިހުންނަނީ ދިގު އޮޑި ހަނެއްގެ ސިފައިގައި ލޮއިން ހަދައިފައެވެ (2) ފުކެއްލައިގެން ތެޔޮ އަޅައިގެން ދިއްލާން އިހުގައި ގެންގުޅުނު ބައްތިއެއް މިހުންނަނީ ދިގު އޮޑިހަނެއްގެ ސިފައިގައެވެ ހަދައިފައި ހުންނަނީ ލޮއިންނެވެ
ކާޑުމަސްބައި
ނ ކާޑުގެޒަމާނުގައި )ދެވަނަބޮޑު ހަނގުރާމައިގެ ދުވަސްވަރު( ރަށްރަށުގެމީހުން ކާޑުގެއަށް އަޅައި އުޅުނު މަސްބައި މިއީ އިހުގައި ކޮންމެ ދޯންޏަކުންވެސް ފަޅުވެރިޔަކާ އެއްވަރަށް ނަގައިއުޅުނު މަސްބައެކެވެ. މި މަސްބައިނަގައި އުޅުނީ ރައްޔިތުގެއިން ކުރަންޖެހޭ ޚަރަދުތައް ކުރުމަށެވެ. މިސާލަކަށް: ރަށުގެރައްޔިތުން ދަރަންޏަށްގެންނަ ކާޑުގެބާވަތްތަކުގެ އަގުހަމަޖެއްސުމާއި މަދަރުސާ މަކްތަބު ފަދަ ތަންތަނަށް ޚަރަދުކުރުމާއި ބަންޑާރަދަތުރުގެ ކޮއްތުދިނުންފަދަ ކަންތައް ކުރުމަށެވެ
ކާޑުގެ
ނ އިހުގައި ރާއްޖެތެރޭގެ ރަށްރަށުގައި ކާޑުގެކަންތައް ހިންގައި އުޅުނުތަން
ކިރުރިހަބަތް
ނ އިހު ޒަމާނުގައި މުލަ ރޯދަ ދުވަހު ޣާޒީ ބަންޑާރައިންގެ އަހަރުމަތިފުޅަށް ކައްކައިއުޅުނު ކޭމެއް މިކޭމުގައި ހުންނަނީ ބަރަބޮލު ރިހައާ ބަތާއި ކިރެވެ
ކިއެވެނީން
ނ އިހުގައި ރަސްމީ ކިޔެވުންތައް ކިޔަވާން ދައުލަތުގެ ފަރާތުން އުޖޫރަދެއްވައިފައި ތިބިމީހުން
ކިލެގެބުރުޒު
ނ މާލޭގައި އިހުގައި ހުރި ބުރުޒުތަކުގެ ތެރެއިން އެތެރެކޮއިލު ބުރުޒު
ކުނބުރު
ނ (1) ކަޅުރަތް ކުލައިގެ ފަތިކޮށް ވައްކޮށް ހުންނައޮށެއް. މީގެ މަދު ބޭހަށް ބޭނުންކުރެއެވެ. މިއީ ވެލެއްގައި އަޅާ އެއްޗެކެވެ. މިވެލުގެ ފަތް ހުންނަނީ ވަށްކޮށް ގޮނިކޮށެވެ. މިފަތް ބޯވާނެއެވެ. (2) ސިފައިންނާ މަގު ހިނގާމީހުން ފެން އަޅައިގެން ގެންގުޅޭ ވަށްކޮށް ފަތިކޮށް ހުންނަ ކަންވާރެއް (3) އިހުގައި ބަޑިބޭސް އަޅައިގެން ކަރައިން ގެންނަ ކަންވާރެއް (4) ފެންއަޅަން ގެންގުޅޭ ކަޅުމުށީގެ މުޑުކާ
ކުނޑިޖެހުން
މ (1) އަތްކަންކުރާމީހުން ވިރިކެކޭ އެއްޗެހި ބައްދާއިރު އެބައްދަންވީތަނެއްގައި އެކަމަށް ތައްޔާރުކޮށްފައިހުންނަ ކުނޑީގެ އެތިކޮޅެއް ތަތްކޮށްލުން (2) ނީ ހަނޑުލާއި ބުރިހަނޑޫ ވަކިނުކޮށް ކުނޑިތައްދާވަރަށް ކިރިޔަ ކިރިޔާ ހަނޑޫ ފޮޅުން (3) ސ މޫނުގައި ފުށްޖެހުން
ކުނިކަހާފިހިގަނޑު
ނ ތަޅުމާއި ފަންގިފިލާފަދަ ތަންތަނުން ކުންޏާއި ވެލިސާފުކުރަން ބޭނުންކުރުމަށް ހަދައިފައިހުންނަ އެއްޗެއް ބޮނބިނަރާއި އަދި މިނޫންވެސް އެއްޗިހިން މިހަދައި އުޅެއެވެ
ކުރަހަނިކަން
ކ އިހުގައި ސަރުކާރުން ދީ އުޅުނު ވަޒީފާއެއްގެ ނަން
ކުރުކުރު
ނ ފަލަމަޑީގެ ބާވަތެއް މިއީ މަތިވައް ފަތްހެން ފަތްހުންނަ ވެލެއްގެ ގޮނޑިއެކެވެ މީގެ ބޭރުހުންނަނީ ކަޅު މުށިކުލައެއްގައެވެ ތޮށިގަނޑުގައި ނަރުވާތަކެއް ފަޅައިފައިހުރެއެވެ މިވެލުގައި އަޅާ އެއްޗެއްސަށް ކިޔައި އުޅެނީ ކުރުކުރުކައްޓަލައެވެ އެ ހުންނަނީ ކުދި ކޮންނެވެ
ކުޅިބަލާގެ
ނ (1) އިހުގައި އަންހެނުން މަގުމަތި ބަލާން އަރައި ތިބުމަށް މަގުމަތީ ފާރުކައިރީގައި ތަންކޮޅެއް އުސްކޮށް ހަދައި ހިޔާކޮށްފައި ހުންނަތަން (2) ކުޅިބެލުމަށްޓަކައި އިށީނދެ ތިބުމަށް ހަދައި ހިޔާކޮށްފައި ހުންނަތަން
ކުއްލާބުތެލި
ނ އިހުގައި ރޯދަމަހު ކޮންމެ ދުވަހަކު އިރު އޮއްސޭއިރަށް ގަނޑުވަރުތެރޭ ކުއްލާބުގެއަށް ފޮނުވާ ކަލިޔާ ބިރިންޖީތެލި. މިތެލީގައި ވިހިނާޅި ހަނޑުލުގެ ބަތާއި އެޔާވާނެ ގުޅަމަހާއި ހަކުރާއި ލޮނުލުނބޯ ހުންނާނެއެވެ. މިއީ އަތޮޅު އަތޮޅު ދެއްވައިފައި ތިއްބަވާ ބޭކަލުންނާއި ބޮޑެތި ފަޅު ރަށްރަށް ދެއްވައިފައި ތިއްބަވާ ބޭކަލުން ފޮނުވަންޖެހޭ ކެއުމެކެވެ. މިފޮނުވާނީ އެކިދުވަހު އެކި ބޭކަލުންނެވެ. މިއީ ގަނޑުވަރުތެރޭގައި އުޅޭ މީހުންނަށް ދޭ ކެއުމެކެވެ މިކެއުން ގެންދާއިރު ލިބުނު އެންމެ ބޮޑު ކުރުނބާ އިހަލެއް ގެންދާނެއެވެ މިކުރުނބާއިހާ ދަނޑި މާރުލައިގެން ގެންދަނިކޮށް ފަގީރުކުދިން މިއިހާ ކަނޑައިލައިގެން ބަހައިލުމީ ހުއްދަކަމަކަށްވާތީ ވަރަށް މަދު އިހަލެއްނޫނީ ގަނޑުވަރުތެރެޔަށް ގެންދެވޭ ކަމަކަށް ނުވެއެވެ
ކުވާބުރުން
މ (1) ގައިގައި ރޮނގުއެޅި ފުސްވެފައިހުރުން (2) މޫނުގައި ނިދިކުޅާއެކު ފޫބުރުން
ކުލަކޮކާމަސް
ނ ކޮކާމަހުގެ ބާވަތެއް. މިއީ ފަރުފަޅުތަކުގެ ބޭރުމަތީގައްޔާއި ގުންޑޮޅިތަކާ ފަރުގައި އުފެދިފައިހުންނަ ހޮހަޅުތަކުގައި ދިރިއުޅޭމަހެކެވެ. މުޅިމަހުގެ ހުރަހަށްވާގޮތަށް ދޮންނާރިނގުކުލައާއި ހުދުކުލައާއި ނޫކުލައިގެ ރޮނގުތަކެއް ހުރެއެވެ މަހުގެ ނިގޫ ފަތާއި ކުޑަ ކޮތަރިބައިގެ ކުލައަކީ ރީނދޫ ކުލައެވެ
ކުޑަ އޮޅަންނަ އޮޅި
ނ އިހުގައި އަސްކަރުންގެ ބައިތަކުގެ ތެރެއިން ބައެއްގެ ނަން މިބައި ޙަވާލުވެފައި އޮންނަނީ ދޮށިމޭނާ ބޭކަލަކާއެވެ
ކުޑަހިތި
ނ (1) އިހުގައި ރަސްކަމުގެ ފަރާތުން ރަސްމީގޮތުން ފާހަގަކުރި ދެދުވަހާއި އެދެދުވަހުގެ ރެއަށް ކިޔާއުޅުނު ނަމެއް. ރަމަޟާންމަހުގެ 26 ވަނަ ދުވަހަކީ ހޭންވޭރު ކުޑަހިތި ދުވަހެވެ. އެދުވަހުގެރެއަކީ ހެންވޭރު ކުޑަހިތިވިލޭރެއެވެ. ހެންވޭރު ކުޑަހިތިވިލޭރޭ ރަދުން ރަސްމީ ޢިއްޒަތުގައި ހިއްޗަށް ވަޑައިގަންނަވާނީ މެދުޒިޔާރަތްދޮށަށް ޒިޔާރަތްކުރައްވައި ފާތިޙާ ވިދާޅުވާށެވެ. ދެން އަންނަނީ މާފަންނު ކުޑަހިތިދުވަހެވެ. އެއީ ރަމަޟާންމަހުގެ 28 ވަނަ ދުވަހާއި އެދުވަހުގެރޭ 29 ވިލޭރެއެވެ. މިރޭ ރަދުން ރަސްމީ ޢިއްޒަތުގައި ހިއްޗަށް ވަޑައިގަންނަވާނީ ފަޤީހުސުލައިމާނުގެ ޒިޔާރަތްދޮށަށް ޒިޔާރަތްކުރައްވައި ފާތިޙާ ވިދާޅުވާށެވެ. (2) ކ އަތޮޅުގެ ފަޅުރަށެއް