radheef.info
ރަދީފު


ކުރަ
ނ (1) ދިރޭ އެއްޗެހީގެ ހަމުގައި ބޯކޮށް ރާޅުކޮށް ހެދިފައި ހުންނަ ތަންތަން (2) ބައެއް މޭވާއާއި ތަރުކާރީގެ ބޭރުގައި ބޯކޮށް ހަރުކޮށް ހުންނަ ތަންތަން (3) ގަސްގަހުގެ ތޮށީގައި ބޯކޮށް ހަރުކޮށް ހުންނަ ތަންތަން (4) )ސ( ވައްގަނޑުން އެއްޗެތި އޮއްސާން ހަދައިފައި ހުންނަ ބާވަތް ބާވަތުގެ ކަންވާރު (5) )ބދ ( ފުށަތް
ކަތީބު
ނ (1) މާލެފިޔަވައި ރާޖޭގެމީހުންއުޅޭ ރަށްރަށުގެ ވެރިކަމާ ހަވާލުކުރައްވައިފައި ހުންނަމީހާ. (2) އިހުގައި ހުކުރުނަމާދާއި އީދުނަމާދު އިމާމުވެކޮށް މަރުވާމީހުން ވަޅުލައިހެދުމަށް އިސްކޮށްފައިހުންނަ މީހާ
ކަތުރާން
ނ ވަކިބާވަތެއްގެ ގަސްގަހުންނަގާ ކަޅުކުލައިގެ އޮލަތެލެއް. ކަތުރާންހަދަނީ މިތެޔޮ މަޑުގިނީގައި ކައްކައިގެންނެވެ. މިއި މީރުވަހެއްދުވާ ކަޅުކުލަ ގަދަ ހަރު އެއްޗެކެވެ ދިވެހީން ޢާއްމުކޮށް މިބޭނުންކުރަނީ ރޯގާ މޮޅުއިރު ދުންއަޅާށާއި ދެލަކުޑިގަނޑު ތަތްކުރާށެވެ
ކަލައިކުރުން
މ ދަގަނޑުން ހަދައިފައިހުންނަ އެއްޗެހީގައި ދަބަރުޖެހިޔަ ނުދިނުމަށް ތުތިޔާއަށް ލުން މިކަންކުރަނީ އެ އެއްޗެއް އަލިފާން އާވީގެ ތެރެއަށް ލައިގެން ސާފުކުރުމަށްފަހު މޫސަދަރު ހާކައި އެއަށްފަހު ކުޑަކޮށް ހޫނުކޮށްފައި ވިރުވައިފައިހުރި ތުތިޔާގެ ތެރެއަށް ލައިގެންނެވެ ތުތިޔައިން ނަގައި މޫސަދަރުކޮޅެއް އެއެއްޗެއްގެ މައްޗަށް އެޅުމުން ތުތިޔާ ހުންނާނީ އެއެއްޗެއްގައި ހަރުލައިފައެވެ
ކަލިޔާ
ނ (1) ގިތެޔޮ އަޅައިގެން ކައްކާބަތެއް މި ފޮނިކޮށް ވެސް ލޮނުކޮށް ވެސް ކައްކައެވެ ޢާންމުގޮތެއްގައި މިއީ ރަށްމާލޫދުގައި ހުންނަ އެއްޗެކެވެ (2) ބަށްޓާއި ކޭލުގައި އެއްގަމު ޖަނަވާރުގެ މޭބިސްކުރަނޑި އަޅައިގެން ކައްކާ ހިކިރިހައެއް
ކަސާރީކުރާ
ނ ނަމޫނާކުރާ ބައްޓަމަށް ފަތިކޮށް ކަރު އެއަށްވުރެ ހިމަދިގުކޮށް ހުންނަ ބޮޑު ކުރައެއް މީގެ ވައްގަނޑު ހުންނާނީ ގުޑުގުޑާ ދޫންޏެއްގެ ކަރާ އެއްވައްތަރު ގޮތަކަށެވެ
ކަޑަޖެހުން
މ (1) ކަޑަބިމަށް ވެއްދުން (2) ބިމެއްގެ އިންވަކިކުރަން ބިމަށް އެއްޗެއް ޖެހުން
ކާފޫރުތޮޅި
ނ ކާފޫރުތޮޅި ގަހުގެ ވަކި. މިއީ ތިން އަރިޔަށް ފުއްޕުން ހުރެފައި މަޑު ބޯތޮށްޓެއްގެތެރޭގައި ތިންބަރިޔަށް ކުދިކުދި ކަޅުއޮށްތަކެއް ހުންނަ ކުޑަކުޑަ ތޮޅިޔެކެވެ. މިތޮޅިއަކީ ވަހާއި ރަހައިގައި އާވިގޮތް ހުންނަ މީރުއެއްޗެކެވެ. މިއީ ބޭހަށާއި ކާބާވަތްތަކުގެ ރަހަމީރުކުރަން ބޭނުންކުރާ އެއްޗެކެވެ
ކާޑުމަސްބައި
ނ ކާޑުގެޒަމާނުގައި )ދެވަނަބޮޑު ހަނގުރާމައިގެ ދުވަސްވަރު( ރަށްރަށުގެމީހުން ކާޑުގެއަށް އަޅައި އުޅުނު މަސްބައި މިއީ އިހުގައި ކޮންމެ ދޯންޏަކުންވެސް ފަޅުވެރިޔަކާ އެއްވަރަށް ނަގައިއުޅުނު މަސްބައެކެވެ. މި މަސްބައިނަގައި އުޅުނީ ރައްޔިތުގެއިން ކުރަންޖެހޭ ޚަރަދުތައް ކުރުމަށެވެ. މިސާލަކަށް: ރަށުގެރައްޔިތުން ދަރަންޏަށްގެންނަ ކާޑުގެބާވަތްތަކުގެ އަގުހަމަޖެއްސުމާއި މަދަރުސާ މަކްތަބު ފަދަ ތަންތަނަށް ޚަރަދުކުރުމާއި ބަންޑާރަދަތުރުގެ ކޮއްތުދިނުންފަދަ ކަންތައް ކުރުމަށެވެ
ކިހައް
ނ (1) މިރިޔާއި ކިހަކާއި އަދި ކުރުނބާގެ ކުރީ ކޮޅުގައި އޮންނަ ކެވޭ ޅަތަން (2) ކިހާއް (3) ކިހަވައް (4) ނއ ކޭމާ އަނގަ ކުރަކިވެފައި ކަރުތެރެ ބައްދާގޮތް ހުންނަ
ކިހައްރަހަ
ނ ކޭމާ އަނގަ ކުރަކިވެފައި ކަރުބައްދާގޮތް ހުންނަ ރަހަ
ކިރިއްސުން
މ (1) ތޫނުކަމަކުން އޮށީން ފަންވަތްތައް ވިދިވިދިގެން ވަކިކުރަމުން ގަޔާދުރަށް ގެންދިއުން (2) ކެޔޮފަތް ދަޅީން ވަކިކުރަމުން ގަޔާދުރަށް ގެންދިއުން (3) ތޫނު އެއްޗަކުން އެޅިގެން ހަށިގަނޑުގެ ބޭރުފުށުން ތަނެއް ދިގުކޮށް ނޮޅިގެންދިއުން
ކީމަ
ނ ގަނޑުވަރުތެރޭ އަންހެން ބޭފުޅުން ދުވާލު ތަންތަނަށް ވަޑައިގަންނަވާން ވެދެވަޑައިގަންނަވާ ފޭލިގެ. މިހުންނަނީ ހުދާއި ރަތާއި ކަޅާއި މިތިންކުލައިން ބިހުރައަޅައި ކުރަހައިފައެވެ
ކީމިޔާރޮށި
ނ ނާސްތާކުރަން ގެންގުޅޭ ވައްތަރަކު ރޮއްޓެއް މިއީ މަހާއި ފިޔަޔާ ލައިގެން ހަދާ ރޮއްޓެކެވެ
ކުށްޓަރި
ނއ އެކިއެކި ކަންތަކާ ވާކުށްވެރި މިބަސް ގިނައިން ބޭނުންކުރަނީ ކުދިކުދި ކުށުން ކުށްވެރިވީމައެވެ
ކުނަހަނގާލި
ނ ބޭހަށް ބޭނުންކުރާ ފަތްޕިލާވެއްޔެއް މީގެފަތް ހުންނާނީ ހުސްނުހީނާ ގަހުގެ ފަތާ ވައްތަރުކޮށް އެކަމަކު ރޫޖެހިފައެވެ ގަސްގަނޑުގެ ފަލަމިން ތިންއިންޗި ވަރުވާނެއެވެ އުސްމިން ހުންނާނީ ގާތްގަޑަކަށް 6 ފޫޓު ވަރަށެވެ މިގަހުގެ އޮށްތައް ހުންނާނީ ބޮނޑި ބޮނޑިޔަށެވެ މިއަށް ނިތުބަޑި ކިޔައެވެ އެއީ ނިތުގައި ޖައްސައިގެން ފެޅޭއިރު އަޑު ގޮވާތީއެވެ އަދި ވަލުކުރަދިވެސް މިގަހަށް ކިޔައެވެ
ކުނިކަހާފިހިގަނޑު
ނ ތަޅުމާއި ފަންގިފިލާފަދަ ތަންތަނުން ކުންޏާއި ވެލިސާފުކުރަން ބޭނުންކުރުމަށް ހަދައިފައިހުންނަ އެއްޗެއް ބޮނބިނަރާއި އަދި މިނޫންވެސް އެއްޗިހިން މިހަދައި އުޅެއެވެ
ކުނިކޮށި
ނ އުކާލަން ގެންދާކުނި ޖަމާކުރަން ހަދައިފައިވާތަން
ކުރަހަނި
ނ ބިންވަޅު ނަގައިގެން ނުވަތަ ދެފަށްލާ ޖަހައިގެން ކުރަހާމީހާ
ކުރަހާބޭކަލުން
ނ ރަސްމީ ކުރެހުންތައް ކުރަހާން ދައުލަތުގެ ފަރާތުން އުޖޫރަ ދެއްވައިފައި ތިބޭމީހުން
ކުރަހާކަށި
ނ ލިޔެލާޖަހާ އެއްޗެހިން ލާ ކަނޑާ ކުރަހަންގެން ގުޅޭކަށި